Bandièra01 capçalera  1180x150: Novestivada

Actualitats

Sardenha: la cort de Sàsser rebuta l’extradicion de Puigdemont

La jutgessa ditz que cal esperar que la justícia europèa se pronóncie

| Lourdes Ciuró

Tèxte legit

La cort d’Apellacion de Sàsser (Sardenha) a rebutat l’extradicion de Carles Puigdemont que la reclamava la justícia espanhòla. Puigdemont èra ièr dins l’illa per èsser entendut pel tribunal sarde en seguida del procès dobèrt après sa detencion lo 23 de setembre passat. La jutgessa ditz que cal esperar que la justícia europèa se pronóncie. Es çò qu’avián demandat los avocats del president catalan en exili.
 
Lo jutge de la Cort Suprèma espanhòla aviá tornat demandar al tribunal italian l’extradicion de Puigdemont, e tanben de Clara Ponsatí e Toni Comín, elegits catalans en exili que s’èran gandits en Sardenha per acompanhar Puigdemont. Mas las autoritats italianas los an pas quitament detenguts.
 
A la sortida del palais de justícia, Puigdemont saludèt la molonada que l’esperava a la pòrta en portant de drapèls sardes e catalans e en celebrant l’eveniment. Puèi Puigdemont faguèt una conferéncia de premsa a l’Alguer.
 
Dins la dimenjada passada, lo cap del Partit Popular prometèt dins un discors plan dur qu’obtenheriá la detencion e l’extradicion de Puigdemont del temps que la molonada cridava al comolum de l’excitacion “Puigdemont en preson”.
 
 
Un procès europèu
 
Lo Parlament Europèu aviá levada l’immunitat parlamentària als elegits independentistas catalans en març passat, en seguida de la demanda de la Cort Suprèma espanhòla. Mas la Cort Generala de l’Union Europèa (CGUE) acceptèt las mesuras de precaucion provisòrias demandadas pels avocats dels catalans. Puigdemont, Ponsatí e Comín devián aver, doncas, l’immunitat tant que la CGUE estudiava d’a fons lor recors. En junh, l’avocat general de l’estat espanhòl assabentèt d’efièch que los mandats europèus d’arrèst contra eles èran suspenduts. Pasmens, o faguèt pas la Cort Suprèma espanhòla e lo jutge Llarena volguèt aprofechar lo viatge de Puigdemont a l’Alguer per ensajar de lo deténer aquí amb l’espèr qu’aquel còp seriá extradit, car Itàlia reconeis lo delicte de sedicion. L’inexisténcia d’aquel delicte en Alemanha aviá per contra empachada l’extradicion de Puigdemont mentre qu’èra pas encara estat elegit eurodeputat. De soslinhar que las justícias d’Alemanha, de Belgica, d’Escòcia, de Soïssa e d’Itàlia an totas refusada l’extradicion dels independentistas catalans exiliats.



abonar los amics de Jornalet

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
2.

« Dins la dimenjada passada, lo cap del Partit Popular prometèt dins un discors plan dur qu’obtenheriá la detencion e l’extradicion de Puigdemont del temps que la molonada cridava al comolum de l’excitacion “Puigdemont en preson”. » N'es a creire que l'exterminacion franquista de totes los esquerristas actius entre 1936 e 1939 a daissat, en defòra de Catalonha, un país poblat sonque de nècis e de braus assedats de poder e de supremacisme fondamentalament racista. Ont son passats los ciutadans senuts que defendon los dreits umans, en Castilha ?

  • 12
  • 2
Pitaluga
1.

Encara un còp de pè al cuol dels jutges espanhòls e del criptofranquisme. Lo retorn del President a Catalonha ven possible. Serà un grand jorn de fèsta. (Ja èra tornat a Catalonha : a Perpinhan. Ara, cal anar a Barcelona!)

  • 12
  • 1

Escriu un comentari sus aqueste article