Actualitats
Auloron: la Trobada d'Agòr s'interessarà augan a la toponimia e a la senhaletica
Las recèrcas suus noms deus lòcs que permetón au monde deu parçan de s’apoderar ua part deu patrimòni linguistic en entinoar ua senhaletica occitana
Un an de mei, l’associacion d’Auloron Transmetem qu’organiza la soa “Trobada d’Agòr”. Augan que portarà suus tèmas tanhents de la toponimia e de la senhaletica. Que’s debanarà aqueste dissabte 20 de noveme a l’ostau de vila d’Auloron e Senta Maria de 10 òras deu matin dinc a 6 òras deu vrèspe.
Las recèrcas suus noms deus lòcs, particularament las de Miquèu Grosclaude, que permetón au monde deu parçan per miei deus militants e elejuts convençuts de s’apoderar ua part deu patrimòni linguistic en entinoar ua senhaletica occitana mei anar mei creishenta. Cinc intervienents qui son estats testimònis d’aquera volontat qui a espelit capvath Bearn e lo Bascoat illustraràn la diversitat de las realizacions:
10h10 Dàvid Grosclaude: “Toponimia e senhaletica: de la pedagogia a la politica lingüistica”.
11h00 Bernat Casanava: “Noms de carreras, de camins e de comunas en occitan: parçan de Lac e territòri de la CCLO”.
14h30 Peio Dibon-Elissiry: “Adreçatge e senhaletica plurilingua dens la Comunautat d’Aglomeracion País Basco”.
15h15 Serge Mauhourat: “Toponimia i senhaletica de Bòrdas (parçan de Nai) enlà, dinc a Cèta Eigun en Aspa”.
16h00 Alain Fortané: “Projècte Memòrias: sauvagarda toponimica e ensais etimologics”.
Cada expausat serà lo parat de mentàver las diferentas circonstàncias e las presas de consciéncia a la causa de las accions e deus projèctes de senhaletica en occitan. Tà’n saber mei vesitatz lo sit de la comuna d’Auloron e Senta Maria.
Loïson Grangèr
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 Uèra, pròba qu'a Auloron de que n'i a qui parlan occitan.
Ua senhaletica GAS-CONA. N'èm pas a Montpelhièr ací, Diu vivant.
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari