Bandièra01 capçalera  1180x150: Novestivada

Actualitats

Nos a quitats Anna Maria Poggio

Foguèt un element essencial de l’occitanisme en Provença e dins la rèsta d’Occitània

La còla de Jornalet l’entrevistèrem fa 10 ans, quand aqueste jornal veniá d’espelir après la manifestacion de Tolosa lo 31 de març de 2012
La còla de Jornalet l’entrevistèrem fa 10 ans, quand aqueste jornal veniá d’espelir après la manifestacion de Tolosa lo 31 de març de 2012 | IEO
Nos a quitats Anna Maria Poggio, militanta infatigabla e element essencial de l’occitanisme en Provença e dins la rèsta d’Occitània. Son decès lo ven de raportar per e-mail Miquèu Arnaud, president de l’Institut d’Estudis Occitans de Provença, que definís Poggio coma “pielon essenciau de l’occitanisme despuei leis ans 1960” e nos remembra qu’ela “foguèt militanta de basa fins a ocupar de responsabilitats a l’IEO Federau”.
 
Demest l’immensa òbra de Poggio per la lenga e per lo país, voldriam remarcar son trabalh dins l’organizacion de las manifestacions Anem Òc per la lenga occitana. En tant que pòrtavotz permanenta de la Coordinacion “Per la lenga occitana”, la còla de Jornaletl’entrevistèrem fa 10 ans, quand aqueste jornal veniá d’espelir après la manifestacion de Tolosa lo 31 de març de 2012. Volèm ramentar qualques unas de sas paraulas:
 
«Òc, lei manifestacions an rendut leis institucionaus de quauquei regions atentius ai demandas dei ciutadans e leis a endraiats dins la mesa en plaça d’una politica lingüistica publica volontarista en favor de la lenga occitana. Es ben mai es pas encara pron! De mai, fau qu’aquesta politica vengue interregionala e coerenta au nivèu de tot lo relarg occitan. Au nivèu nacionau, aquestei movements an permés de faire espelir lo debat en plaça publica e nacionalament fins a n’arribar a l’inscripcion dei lengas regionalas dins l’article 75-1 de la Constitucion. Es una avançada simbolica. Mai sabèm, uei, qu’es tanben una engana, puei que politicians e tribunaus nos afortisson de lònga qu’aquesta inscripcion dona “…ni mai libertat ni mai drech ai lengas regionalas…” e n’avèm quasi cada jorn de pròvas novèlas…
 
[...]
 
Deu èstre una lei que done un vertadier estatut juridic ai lengas regionalas, que done drech e libertat per permetre l’aplicacion d’una politica lingüistica publica eficaça (e aquò, sus tot l’espaci occitan) per revitalizar la transmission e socializar la lenga occitana dins totei lei domenis de la vida vidanta.»
 
Legissètz l’entrevista entièra sus: jornalet.com/5
 
 




 
 abonar los amics de Jornalet

 

 
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Nicòla Tolosa
7.

Lo Caireforc Cultural Naut Bernat e Escambiar presentan a la seuna familha lors condolenças atristadas.
Es totjorn trista la disparicion d’un militant…
Anna-Maria, l’aviam encontrada dempuèi la fin de las annadas 70.
Cossì podriam la qualificar ? : Avià totjorn lo sorire, era graciosa, joiosa, e totjorn seriosa dins las accions qu’avèm menadas amassa, de cotria.
L’aimavam, bravament, e mai se las annadas passadas, aviam pas pus de contactes, pus de projectes a partejar.
Sabiam qu’èra aquì, coma inscricha per totjorn dins lo Catalòg Grand de las Ressorças Umanas de l’aventura occitanista.

  • 2
  • 0
Márcio de Oliveira Recife, Brasil
6.

De 2011 fins a 2013 ai trabalhat coma encargat de comunicacion a la seccion federala de l’Institut d'Estudis Occitans, dins la Vila Mondina, Tolosa de Lengadòc. A l’arribada èri sonque un Brasilièr de mai en França, jovenòt e afogat de lètras e tròbas occitanas. Aviái pauc d’estudis de la lènga nòstra, mas aviái tanben los uèlhs plan lusents, curioses. Encara uèi sabi pas perqué me causiguèron per la foncion, mas ne soi segur que lo sieu det a l’Anna i es tanben. E aquò, o sabi plan perque, del primièr còp que nos sèm parlats, trobèri sus sa votz suava la fisança per anar totjorn mai luènh e l’acuèlh que faguèt dels Occitans ma segonda familha, mai que mai pendent mos piègers moments sus l’autre costat de la Mar Granda, abans d’èsser obligat a tornar al mieu país. Grandmercés, Anna Maria, e a lèu. Desescusa-me se parli tròp d’ieu, mas ara es tot lo ben que tu, Pèire, Laurenç e Cathy me faguèretz que me ven al còr.

  • 21
  • 0
Domergue Sumien
5.

#4 Anna Maria Poggio es una personalitat exemplara de l'occitanisme. Nos manca fòrça.

  • 26
  • 0
Reinat TOSCANO LO VAU
4.

Se tótei leis occitanistas que son totjorn a criticar faguèsson dins sa vida 1/1000 de çò que faguèt Anna-Maria, Occitania sariá dins una situacion ben melhora qu'aquela actuala! T'oblidarèm pas!

  • 20
  • 2
Reinat TOSCANO LO VAU
3.

Se tóteis leis occitanistas que son totjorn a criticar faguèsson dins sa vida 1/1000 de çò que faguèt Anna-Maria, Occitania sariá dins una situacion ben melhora qu'aquela actuala! T'oblidarèm pas!

  • 27
  • 2

Escriu un comentari sus aqueste article