Bandièra01 1180x150: País Invisible

Actualitats

La fendascla dins lo cercle de poder de Putin: “Quicòm a cambiat en Russia”

Convèrsa amb Marta Ter, especialista de Russia, sus la propaganda oficiala de Putin e l'usura intèrna que pòt aver

Tèxte legit

Lo jornalista de Vilaweb, Josep Casulleras Nualart, a parlat amb Marta Ter, expèrta en relacions internacionalas e especializada en Russia e lo Caucàs, a prepaus de las informacions que se difondon en Russia sus la guèrra e a prepaus de la contèsta que Putin comença de patir, una contèsta sociala mas tanben dins lo quite cercle de poder de Putin. En seguida vos prepausam una adaptacion en occitan del reportatge .


L’informatiu del primièr canal de la television estatala russa de dissabte se connècta amb un reportèr qu’es a Sebastòple, en Crimèa, e que mòstra un grop de soldats que venon de desembarcar, a qui donan un pichon lòt de manjar e una botelha d’aiga minerala. Explica que s’agís de soldats ucraïneses capturats a Odèssa, d’òmes que las autoritats d’Ucraïna considèran mòrts, mas que son vius, e que las autoritats russas an la benevolença de los manténer en vida, los far pojar dins de minibusses amb de manjar e d’aiga per los remandar sans e salves en cò lor. Vesèm pas pro ben las caras dels militars quadrats per las camèras, mas lo messatge de la television estatala russa es clar: Ucraïna difond de messorgas, fa de propaganda basada sus d’informacions falsas, ensaja de far creire que i a de militars mòrts venguts de martirs que, en realitat, son de desertors que Russia a ben tractat e que los a remandats a l’ostal.
 
Es un exemple d’explicar lo conflicte qu’an los mèdias oficials russes, segon Marta Ter, expèrta en relacions internacionalas, cercaira e una granda coneisseira de Russia e del Caucàs. “La television e la premsa escricha estatala explican que las fòrças armadas russas son en Ucraïna per defendre sa populacion dels neonazis que los vòlon agarrir, que son eles que van protegir la populacion del país vesin. Arriban de dire que quand las tropas russas intran dins una nòva vila o vilatge d’Ucraïna, sos abitants los aculhisson, e que quitament qualques vièlhs brandisson de drapèls sovietics”, çò explica Ter a Vilaweb.
 
Vaquí lo raconte oficial rus sus la guèrra d’Ucraïna, qu’es pas presentada coma una guèrra. “Eles asseguran que i a pas que d’atacas cirurgicalas solament sus las infrastructuras militaras d’Ucraïna, e afortisson que cap pas de civil es damatjat. E regiblan lo clavèl en explicant que i a de desercions massissas dels soldats ucraïneses”, coma lo cas dels presumits soldats arribats en Crimèa e tornats a l’ostal.
 
 
Lo jorn del cambiament sobde dins lo discors oficial rus
 
Mas Ter soslinha un fenomèn que s’èra pas vist dins los mèdias oficials russes qualques jorns abans l’invasion d’Ucraïna. “Quand l’Ostal Blanc comencèt de rendre publics de rapòrts de l’intelligéncia dels Estats Units qu’indicavan que Russia ocupariá Ucraïna dins qualques jorns, los mèdias, tant a l’interior coma l’exterior (Russia Today e Sputnik), se trufavan d’aqueles avertiments. Disián qu’Occident fasiá de proclamacions istericas, que Russia aviá pas cap d’intencion d’ocupar Ucraïna, e que los sols qu’ocupavan de païses sobeirans èran los Estats Units. Totes los mèdias mantenguèron aquel discors fins al 18 de febrièr. Aquel jorn, la propaganda faguèt una revirada. De ser, los informatius de la television parlavan ja de genocidi en Donbass e que s’evacuava la populacion de las republicas de Donetzk e de Luhansk.”
 
E l’intensitat de la propaganda aumentèt espectaclosament, coma o explica: “Mostravan de sabotatges dins una fabrica quimica de Donetzk, apareissiá un militar ucraïnés capturat en Donbass qu’explicava que lo govèrn de Kyiiv planificava un atac mortal, raportavan de veituras bomba qu’espetavan sens aver daissat de victimas, de bombas non espetadas trobadas sus las estradas sus las qualas fugissián devèrs Russia los autobusses plens de refugiats… Los informatius èran comols d’imatges de vièlhs, de femnas e d’enfants qu’arribavan espaventats en Russia, e se parlava solament de las atrocitats que Kyiiv èra a mand de cometre. Vladimir Putin apareissiá coma lo salvador dels russes qu’èran a mand de patir un genocidi.”
 
Es a aquel ponch, çò explica Marta Ter, que Putin ditz dirèctament qu’Ucraïna es un estat fictiu governat per de neonazis, que “cal desmilitarizar e desnazificar”. Es lo messatge que lo difond lo president rus la nuèch que comença l’ofensiva de granda escala contra Ucraïna. Mas dins son discors de la velha, ont reconeissiá l’independéncia de Donetzk e de Luhansk, i aviá ja los elements amb los quals Putin preparava lo raconte de l’invasion. Ter ne remarca qualques extraches significatius. La cercaira obsèrva: “Dempuèi que Putin es al poder, a volgut donar un imatge de dirigent e de país que respondon amb fermetat a las agressions imperialistas dels Estats Units e de l’OTAN. S’es creat e difondut suls mèdias estatals un discors patriotic e autoritari que remarca que Russia deu aver lo ròtle de poténcia globala que la tòca istoricament. E que s’es pas una poténcia mondiala es perque Occident la grèuja de longa, e que sa sobeiranetat e son integritat son constantament en perilh.” O disiá aital Putin: “Torni dire, nòstras accions nos defendon de las menaças que nos crèan, e nos prevenon d’un desastre encara mai grand que çò que se debana uèi.”
 
L’imatge d’una Russia descricha coma un país secutat pels enemics que la vòlon paura e umiliada es acompanhat dins los mèdias oficials d’un relat fòrtament patriotic. “Lo ponch fòrt d’aquel raconte es lo fach que l’Armada Roja foguèt la pèça clau per véncer Hitler e lo faissisme. Es pas una coïncidéncia que la granda fèsta nacionala de la federacion russa siá lo 9 de mai, quand se commemòra la victòria suls nazis. E aquò es totalament restacat amb lo discors actual de desnazificacion e de lucha contra lo faissisme, e un dels ponches centrals de la guèrra d’Ucraïna. I a l’idealizacion d’un país qu’es demorat tot sol a se batre contra lo faissisme en Ucraïna dins aqueles messatges.”
 
A prepaus d’aquò, Marta Ter soslinha un fragment del discors de Putin: “Eles [los dirigents ucraïneses] anaràn contra Crimèa, del meteis biais que contra Donbass, amb una guèrra, per tuar, coma las bandas de nacionalistas ucraïneses, complices d’Hitler, que tuèron de personas sens defensa pendent la granda guèrra patriotica. Declaran dobèrtament que reclaman mai de territòris russes. Lucharem per la desmilitarizacion e desnazificacion d’Ucraïna. […] Lo resultat de la Segonda Guèrra Mondiala, coma tanben los sacrificis realizats per nòstre pòble per la victòria sul nazisme, son sagrats.”
 
A l’encòp, los mèdias prepausan un imatge positiu e eroïc de l’istòria nacionala russa, per que los ciutadans se’n pòscan sentir fièrs, çò remarca Marta Ter. Putin disiá per justificar la guèrra: “Caliá arrestar immediatament aquela cachavièlha: lo genocidi contra de milions de personas que demòran aquí, que se fisan solament de Russia, qu’an d’espèr solament en nosautres.”
 
Per el, Ucraïna, la “pichona Russia”, es solament una estenduda de Russia, çò ditz la cercaira. “Vòl totjorn dominar l’espaci de l’anciana URSS. Abans, dins la guèrra de 2014, defendiá qu’èran lo meteis pòble, “un pòble fraire”, mas ara va mai enlà e descriu Ucraïna coma un estat fictiu, creat per Lenin. Tant qu’en Ucraïna vivon de russes el aurà l’obligacion morala d’intervenir en favor de tot rus que se tròbe menaçat. Aquel meteis discors dels russes que demòran a l’estrange mas qu’el los deu salvar l’empleguèt ja en Abcazia e en Ossetia del Sud en 2008.”
 
 
La deterioracion de Putin a l’interior
 
Mas i a un factor diferencial entre aquesta invasion e la d’Abcazia e d’Ossetia, segon Ter. “I a quicòm qu’a cambiat en Russia. Sa deriva bellicista a pas lo sosten d’una part de la populacion. En las guèrras ont aviá mandat dobèrtament de tropas fins ara, en Georgia en 2008 e en Ucraïna en 2014, la popularitat de Putin cresquèt fòrça. Alavetz tanben empleguèt l’argument dels russes a l’exterior, qu’el los deviá salvar de la salvatjariá, etc. Alavetz li foncionèt. Mas alavetz i aguèt pas d’ataca de la portada de l’actuala. Ara a passat l’òsca. Se se foguèsse arrestat a la reconeissença de las doas republicas de Donbass, seriá arribat fins al meteis ponch qu’arribèt en Ossetia e Abcazia. En aquel moment saupèt far valer sos avantatges, aquò e li serviguèt per que Georgia poguèsse pas intrar dins l’OTAN e per aver un element destabilizaire. Mas ara a passat l’òsca.”
 
E, coma o explica, en Russia i a fòrça gents qu’o comprenon pas. “Dempuèi lo primièr jorn, en plaça de l’euforia e de las mòstras de patriotisme, avèm vist de gents que riscan lor pèl en manifestant per carrièras per dire «non a la guèrra». E non pas solament a Sant Petersborg e a Moscòu, mas en Siberia. Aquò es nòu, s’èra pas jamai passat dempuèi que Putin es al poder, ni amb Chechenia ni amb Siria, que son de luòcs luènhs. Mas Ucraïna es diferenta, la considèran coma un pòble fraire, parlan rus, son d’eslaus.”
 
Aquò es lo primièr element diferencial que i a ara al nivèl intèrn, segon Marta Ter. Lo segond es lo dels oligarcas. “Amb aquelas sancions, e se l’ofensiva bellicista dura longtemps, perdràn lor argent. Son de gents pragmaticas, capitalistas, e çò que se passa ara lor agrada pas brica. Aquela aventura patriotica e bellicista de Putin lor sembla una bestiesa. Mikhaïl Fridman, Oleg Deripaska e Oleg Tinkov an ja dich que la veson pas ben, la guèrra. Aquelas gents an fòrça poder, dins Russia e defòra, e pòdon dispausar de fòrça recorses e tirar fòrça cordils al Kremlin.”
 
S’i pòt aver aicí una fendascla dobèrta dins lo cercle de poder de Putin? “Exacte –çò respond Ter–. Que las gents que i a a l’entorn de Putin, o almens qualques unes, vejan qu’aquò pòrta pas cap de profièch a Russia, qu’aquela invasion a pas cap de sens, pel mal economic que pòt ocasionar.” Considèra mai probable que Putin siá arrestat a l’interior de Russia que non pas a l’exterior, que la fendascla que mençona siá pro gròssa per lo demetre del poder. Mentretant, la repression intèrna en Russia creis exponencialament. “Tot aumenta, tot s’accelèra, coma una granda bòla de nèu que s’arrèsta pas jamai.”
 
 
 
 
Josep Casulleras Nualart
Reportatge publicat originàriament en catalan sus Vilaweb




abonar los amics de Jornalet

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Delbòsc
12.

#11 L'interès dels americans es pas mai en Euròpa, sèm completament d'acòrdi. Amai o sabèm dempuèi Obama e n'avèm pas tengut compte. La dificultat principala es que los païses europèus consacran tròp pauc d'argent a la defensa, per tal de salvar la politica sociala, probable. Amai agèsson d'armadas pus fòrtas, aquelas armadas serián pas coordenadas tant estretament coma la d'un estat vertadièr. La CED, que dins la practica auriá obligat a una politica estrangièra unica, foguèt arrestada per la França. E s'i tornarà pas.
Que val mai ? èsser capables de se defendre o venir los vassals d'una granda poténcia ? La responsa es evidenta. Solament, entre las grandas poténcias, n'i a que son pus tolerantas, pus liberalas, pas tant autoritàrias e tiranicas coma d'autras. Dins l'òrdre d'autoritarisme creissent, plaçarai los Estats-Units, la Russia e enfin la China, que coneis pas de partenaris, sonque de vassals. Tanben, i a las poténcias democraticas e las dictaturas. Aqui perqué soi favorable a un atlantisme, qu'espèri provisòri.

  • 1
  • 0
Mai Republica es abordida mai legiférís !
11.

#10

Te dirai que pensi que l’OTAN aflaquís Europa d’aqui estant que L’OTAN son los missils Americans e que tota Europa ne far compte e se cara d’aquela sembla proteccion, lo jorn ont los American ça diran de Non d’aqui estant que l’interest lor es pus en Europa (ara es en Asia) que farèm… ?

I aviá OTAN la caliá pas far crèisser demai qu’aquel non espandiment de l’OTAN fusquèc prometut çò semblariá. D’aqui los trecimacís d’auèi, puèi tanben los consents de Minsk que fusquèron pas jamai aplicats.

S’es balhat cap de garantias (plevensas) a Russia, sonque paraulas de fusta çò me sembla

  • 1
  • 0
Delbòsc
10.

#9 "Per iò al despallament de URSS, l’OTAN aviá cap pus de razons d’èsser. S’es mantengut, per qué far ? Russia voliá conservar los ancians país tanhents de l’URSS dins son airal d’aflat. "
Mercés de far las questions e las responsas. Un explica l'autre, los païses liberats de l'òrre imperialisme rus volián pas venir de satellits.
Mercés de justificar l'existéncia e la conservacion de l'OTAN, son espandiment als estats sortits de l'URSS. Es una pròva d'onestetat intellectuala de vòstra part. Dirai çaquelà qu'es pas ora d'espandir l'OTAn encara mai. Mès aquò vendrà.

  • 0
  • 0
Mai Republica es abordida mai legiférís !
9.

#8

Segurament son un fum de causas qu’an provocat aquel afar. Segur tanben que Russia començèc a Kiyev
https://books.openedition.org/psorbonne/53608iev :

Per iò al despallament de URSS, l’OTAN aviá cap pus de razons d’èsser. S’es mantengut, per qué far ? Russia voliá conservar los ancians país tanhents de l’URSS dins son airal d’aflat. N’en fusquèc atal mer Cazacstan, Ozbequistan, Quirguizstan, Bélarus. Escaperon Letònia, Lituània, Polonha.

Apèi la linha roge pels Rus èra la basas de l’Otan, Russia non voliá èsser enrodada de basas de missils de l’OTAN (americanas), vist que politicament aviá cambiat e que dintrava dins una economia de mercat e que se tenià devèrs una normalizacion.
Doblidèm pas que Russia fins a l’Oral fa partida d’Europa e qu’èra de bona basca de parlar d’aquela possibilitat sul terme long.

Tre 2007 se desgalha aquela convivéncia tampada, mas convivéncia çaquela, dentre Russia, OTAN, America, Europa tanben.
https://www.cairn.info/revue-herodote-2008-2-page-221.htm

Podèm totjorn parlar, de tot biais farà pas enantir Occitània, nimai la lenga nòstra e al nivèl internacional Occitània existís pas sus l’empont politic.

A-n-aquel sicut me torna en memoria çò que disiá Thonas Jefferson :

1787
Depuis Aix en Provence Thomas Jefferson (futur président des USA) écrivait à son secrétaire William Short :
Dans cette lettre il exprime ses sentiments ressentis en terre provençale
Il écrit :
"Une autre circonstance à laquelle je ne m'attendais pas est le changement de langage. J’avais pensé que le provençal n’était qu'un dialecte du français; c'est au contraire plutôt le français qui peut être considéré comme un dialecte du provençal. C'est à dire que la langue originelle est le latin.../..../ C’est mon italien plus que mon français qui me permet de comprendre les gens d'ici. Ce langage sous diverses formes occupe tout le pays au sud de la Loire. /.../ chaque lettre y est prononcée, l'articulation y est distincte, aucun son nasal ne le défigure, et dans l'ensemble il approche en beauté l'italien et l'espagnol. Tout compte fait c'est à mon avis un malheur que les circonstances historiques aient assurés la prédominance du français au lieu du provençal..../
Thomas Jefferson :
Président des États-Unis de 1801 à 1809
http://www.persee.fr/doc/anami_0003-4398_1989_hos_1_1_2888

L'istòria d'Occiània es una longa tièra d'encegaments de descofida d'apensaments qu'an virat a l'estrega. A cap de moments de nòstra istòria avèm sabut nos recampar dins tota Occitània.... e aquò rai la revòltas son pas de manca...
La realitat l'avèm pas jamai volgut vèire.

  • 2
  • 0
Delbòsc
8.

"Per el, Ucraïna, la “pichona Russia”, es solament una estenduda de Russia".
E justament, Potin es un rus tipic, o benlèu caldriá dire un rus caricatural.
Un rus tipic es universalista, es a dire que vei pas las diferéncias etnicas e culturalas.
Que se passèt istoricament ?
Dins la Rus' de Kyiv, probable que i aviá pas de diferéncia neta de sistèma de valors, i aviá un sistèma antropologic de tipe nucleari, leugièrament diferent del Bacin Parisenc, mès individualista çaquelà.
Aquel sistèma antropologic demorèt esquematicament dins la mitat sud, mès la mitat nòrd passèt, jos influéncia tatara (populacion de tipe turco-mongòl), los russes passèron a la familha comunautària exogama, la que predispausa al comunisme (lo mir dels vilatges de Russia es dejà un comunisme rural, çò que Custine sabiá dejà). Arribèt la meteissa causa a la China jos influéncia de las invasions mongòlas periodicas. Los russes son d'eslaus tatarizats. La Russia espandiguèt son modèl antropologic per sas conquèstas, mès los turcs d'Asia Centrala e los georgians son, o de còps èran dejà, de familha comunautària exogama.
Dins la practica, la partida sud de la Rus' de Kyiv refusava lo comunisme. Cal dire, amai siá una evidéncia, que l'antropologia sociala es pas la psicologia e ditz pas res dels individús : parla de la tendéncia generala, la que ganha a la fin. Lo PC sovietic, mai que mai al moment de la collectivizacion, constatèt que l'Ucraïna e las regions prèpas s'opausavan al comunisme. Foguèsson estats de Casacs o d'Osbècs, lo fatràs ideologic marxista auriá trobada una explicacion « materialista ». Mès de monde culturalament semblables, en tot cas lingüisticament ? los comunistas, en bons russes (o en bons georgians), que veson pas e comprenon pas los sistèmas de valors diferents, las particularitats etnicas, sentián aquela estranhetat coma una perversion monstruosa, quicòm que caliá destruire coma las bruèissas en d'autres lòcs. De lor ràbia, venguèt Holodomor. E tornam a Potin. Sent la diferéncia ucraïniana sense la comprene intellectualament. Se l'explica per la propaganda americana o una perversion morala que cal desrabar, extirpar. L'agression de Potin es la seguida d'Holodomor.
Es un combat a mòrt d'un sistèma antropologic, un sistèma de mentalitats, contra un autre. Probablament, a la fin de l'Edat Mejana, lo sistèma antropologic ucraïnés èra majoritari demograficament. La Russia faguèt, inconscientament, tot per l'apichonir. E ara contunha.
Potin s'ataca a un èime que comprend pas, mès que sent coma diabolic e inexplicable, o explicable sonque per una influéncia occidentala. Denèga l'existéncia de l'Ucraïna, mès son agression es una afirmacion de son existéncia.

  • 2
  • 0

Escriu un comentari sus aqueste article