Bandièra01 1180x150: Comuna de Tolosa

Actualitats

Lo jornalista basco Pablo González, encarcerat en Polonha, se pòrta plan mas sap pas perqué l’an embarrat

Lo cònsol espanhòl a Varsòvia a pogut vesitar, enfin, lo jornalista, qu’a totun pas encara pogut parlar ni amb sa familha ni amb son avocat

Tèxte legit

La familha del jornalista basco Pablo González, que raportèrem sa detencion la setmana passada, a agut, enfin, de nòvas sus son estat de santat, çò rapòrtan Naiz e Vilaweb. González se pòrta plan de e es estat corrèctament tractat dins la preson de Rzeszów, segon lo cònsol espanhòl a Varsòvia, Ramón Merino, que lo poguèt vesitar per parlar amb el. Totun, encara ara, una setmana après sa detencion, a pas pogut aver cap d’assisténcia juridica. Son avocat es Gonzalo Boye, lo meteis que defend Carles Puigdemont. Boye a pas pogut parlar amb el malgrat qu’o aja demandat mai d’un còps a l’ambaissada espanhòla. Lo jornalista es acusat d’espionatge per las autoritats polonesas, mas el ditz que sap pas perqué l'an embarrat e que s'en sent frustrat, perque el sonque fasiá son trabalh.
 
Segon lo cònsol espanhòl, Pablo González es en bon estat de santat e pòt desenant recebre de letras de sa familha, mas pòt pas encara parlar per telefòn perque o deu autorizar lo ministèri public e perque las autoritats espanhòlas dispausa de l’autorizacion correspondenta.
 
González nasquèt a Moscòu e mestreja plan lo rus. El es especialista en conflictes dins l’airal d’influéncia de l’anciana Union Sovietica. A la debuta de febrièr, abans que comencèsse l’invasion russa d’Ucraïna, se gandiguèt a Kyiiv e en Donbass per assabentar de la situacion.
 
 
Cossí se passèt sa detencion?
 
Segon lo jornal Público, lo 6 de febrièr, mentre que se trobava a l’èst d’Ucraïna, González recebèt una telefonada dels servicis secrets ucraïneses que li demandèron de se presentar a Kyiiv al pus lèu possible. Un còp aquí, lo jornalista foguèt arrestat e interrogat davant d’agents dels servicis de l’intelligéncia espanhòla (CNI), coma o confirmèt son avocat a Vilaweb.
 
Los agents del CNI acusèron Pablo González d’èsser “pròrús”, li reprochèron d’aver trabalhat pel jornl basco Gara e d’aver una carta de crèdit de la banca basca Laboral Kutxa. Mentretant, d’autres agents del CNI èran al domicili del jornalista en Bascoat, e tanben en Catalonha, per interrogar sa familha e sos amics pròches.
 
Las autoritats ucraïnesas l’expulsèron del país. Dins aquel contèxt, son avocat li recomandèt de rintrar a l’estat espanhòl e o faguèt. Mas, tanlèu començada l’invasion russa d’Ucraïna, González anèt devèrs la frontièra de Polonha e Ucraïna per raportar l’exòde dels refugiats. Aquí foguèt arrestat e encarcerat per las autoritats polonesas. “Fasiá pas que dos jorns que se trobava en Polonha. Comprenèm pas perqué lo detenguèron ni perqué l’acusan d’agir contra los interèsses de Polonha. Espèri de poder parlar lèu parlar amb el”, çò ditz son avocat.
 
Lo govèrn basco assegura qu’es interessat per l’afar. Lo grop politic EH Bildu a demandat d’informacion als parlaments espanhòl e europèu, e Esquèrra Unida a demandat al Ministèri dels Afars Estrangièrs espanhòl qu’intervenguèsse. Plusors jornalistas se planhon del comportament de las autoritats espanhòlas.
 
 
Lo secutament de la premsa basca
 
Gara es un quotidian basco, que subreviu malgrat la persecucion. La justícia espanhòla faguèt pagar al quotidian basco tot lo deute que l’ancian jornal Egin aviá amb la Seguretat Sociala espanhòla. Egin foguèt victima de la persecucion politica de l’estat contra l’esquèrra basquista e li reclamavan un deute de tres milions d’èuros. La còla de Gara poguèt pagar aquesta soma arunan gràcias al sosten de milièrs de personas mas cap d’ajuda institucionala.
 
En 1998, la justícia espanhòla tampèt Egin e ne detenguèt qualques responsables. En 2009, la Cort Suprèma espanhòla daissèt sens efièch lo barrament d’Egin, mas lo quotidian poguèt pas èsser editat tornarmai e mai se li reclamèt un deute enòrme amb la Seguretat Sociala. La justícia espanhòla a fach pagar aquel deute al jornal Gara amb un argument un pauc escur: “la succession ideologica d’entrepresa”.
 
Per poder pagar aquel deute e subreviure, la còla de Gara a organizat aquestes ans d’eveniments solidaris e una campanha d’abonaments que li an respondut environ 10 000 ciutadans.
 
Gara (en basco Sèm) es un quotidian en basco e castelhan que ten 120 salariats e fa trabalhar d’autres 200 professionals.



abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
1.

Lo jornalista basco Pablo González, encarcerat en Polonha, se pòrta plan : mas sap pas perqué l’an embarrat ? Totun, es evident ! Delicte d'opinion. Non es espanholista…

  • 4
  • 0

Escriu un comentari sus aqueste article