Las pluèjas que tombèron durant la fin de setmana passada sus Lengadòc e Catalonha Nòrd son causa d’anullacions de partidas mas, d’una rason l’autra, nos acostumam a aqueles cambiaments permanents de calendièr.

Superliga: quand l’anglés aima pas la pluèja…
 
Dissabte, en fin de vèspre, los Dragons recebián a Brutus los Combatents de Wigan. Òm se seriá cresegut al nòrd d’Anglatèrra amb aquela pluèja fina e permanenta qu’asagava la pelena e los jogaires. Los catalans opausèron una defensa de fèrre als angleses en mal d’inspiracion que, de mai, multipliquèron las maladreiças. Dins lo primièr temps, a la sortida d’una mesclanha, lo dobertura Pearce mistificava 3 defensors per marcar. Puèi, Goudemand recuperava per marcar una pauma arpatejada pels angleses sus un pichon còp de pè de seguir de McIlorum . Dins lo segond temps, Pearce tornava marcar en seguissent un còp de pè de Drinkwater, puèi èra a Samisoni Langi de quichar sus la palma dins l’en-but jol nas d’un jogaire de Wigan. Victòria neta: 28-0.
 
Los afars s’adoban pas per Tolosa, sola formacion sens victòria, que punta a la darrièra plaça al classament aprèp una corta desfaita a Wakefield: 18-6. Dissabte, los occitans reçaupràn los campions de St Helens que son los sols a o aver tot ganhat: victòria neta fàcia a Warrington: 28-2. Las 2 formacions d’Hull ganhan al defòra: l’FC a Leeds 31-8 e  lo KR a Salford: 26-6. Es justament Hull KR que serà aqueste divendres a Perpinhan (partida a 8 e mièja del ser).
 
 
Elèit 1: las dents dels tigres…
 
Albi es l’esquipa en forma d’aquesta passa: dissabte, los Tigres tarneses batèron los Dragonets 32-26. Los audencs viatjan plan: Limós va ganhar a Avinhon 24-6 e Carcassona a una victòria aisida a Tolosa: 62-4.
 
Sesilha de recobrament dissabte que ven pels Dragonets que reçaupràn Lesinhan a Sant Estève. Las autras partidas de la 13a jornada veiràn las oposicions Limós-Albi, Carcassona-St Gaudenç e Vilanòva-Tolosa.
 
 
NRL: … e las urpas de las pantèras
 
En Austràlia, la competicion NRL a représ per una victòria dels campions, las Pantèras de Penrith, fàcia a Manly: 28-6. Melbourne, coma de costuma dempuèi qu’a Craig Bellamy coma entraïnaire (2003), ganha la primièra partida de la sason: 26-16 contra los Tigres. Marcas magrinèlas per Bròncos-Lapinons 11-4 e Vaquièrs-Dògols: 4-6; per contra, plan de punts per las Anguialas que baton los Titans 32-28. La sason es plan lançada dins los estadis qu’an tornat trapar de public.
 
 
 
Alan Roch