L’Assemblada Occitana de las Valadas prepausa la tresena edicion de l’eveniment “una maison, una bandièra occitana” a l’ocasion del jorn de Sant Joan, divendres que ven, una fèsta plan sentida en tota Occitània. Per tant, se crida los ciutadans a metre lo drapèl occitan a la fenèstra o al balcon de lor ostal. Ongan, vòlon dedicar aquesta edicion a Gèli Grande, militant occitanista e copresident del PNO que nos quitèt lo 10 de genièr passat.
 
“La bandiera representa nòstre sens d’apertenéncia a la nacion occitana; un biais per demostrar d’amor a la lenga occitana en mai de la practicar chasque jorn e l’ensenhar a nòstri filhs”, çò precisa Mattia Pepino, militant de l’Assemblada Occitana dins la Val Vermanhana. “Cresèm que devèm pas aver paur d’o declarar publicament amb l’exposicion de la bandiera occitana a nòstri ostals”, çò precisa.
 
La crida s’espandís a “tota Occitània, de la Mediterranèa a l’Atlantic, di Alps ai Pirenèus”. Las cridas precedentas an obtengut un succès inesperat, e ongan s’espèra qu’aquel succès serà pus grand mentre que desiran “una implicacion larja de totas las entitats e associacions occitanistas”.