Bandièra01 1180x150: Comuna de Tolosa

Actualitats

EscòlaInternacionalLengaPolitica

Bascoat Nòrd: de mobilizacions per far lo brevet de sciéncias en basco

Es la quatrena annada qu’escolans e ensenhaires desobesisson a las consignas del rector al risc d’obténer un zèro

| @Maite_Ubiria

Tèxte legit

Mobilizacions al Bascoat Nòrd per reclamar, un an de mai, lo drech de passar lo brevet en basco.
 
Dijòus 30 de junh, los escolans de tresen de Seaska —la filièra immersiva en basco equivalenta a nòstra Calandreta— desobesiguèron a las consignas del rector e redigiguèron lors examens de sciéncias en lenga basca. L’endeman de tantòst, se tenguèt un recampament davant lo collègi de la Ciutadèla de Sant Joan Pè de Pòrt.
 
Las mobilizacions contunharàn aqueste dimars que ven, 5 de julhet, çò rapòrta Mediabask. Las còpias de las espròvas de sciéncias redigidas en basco seràn corregidas al Conservatòri de la Comunautat d’Aglomeracion del Bascoat, a partir de 9h30. Lo meteis jorn a 9h, un recampament serà organizat davant los centres d’examen. A 11h30, los correctors del collègi de la Ciutadèla sortiràn per denonciar lo fach que lor es enebit de corregir las còpias de las sciéncias en basco.
 
Dimars 12 de julhet de matin, se tendrà una ceremònia al sèti de l’Aglomeracion a Baiona. Los escolans se veiràn atribuir las veritablas nòtas de lors examèns de sciéncias redigits en basco.
 
Dempuèi 1994, se permet de redigir en basco las espròvas de matematicas e d'istòria, mas pas las sciéncias. Pasmens, los collegians de Seaska escrivon lors examens de sciéncias en basco e tant escolans coma ensenhaires se baton per que las espròvas sián corregidas. Es la quatrena annada qu’o fan, al risc d'obténer un zèro. Cada an, lo rectorat de Bordèu a menaçat de corregir pas las còpias, mas a finit qu'a escotat las revendicacions dels collegians.
 
Cal esperar que los escolans bascos lèu poiràn far lor brevet en lor lenga sens lo besonh de se batre. Cal tanplan esperar que los collegians occitans lucharàn un jorn en massa en seguissent l’exemple dels bascos.


 


abonar los amics de Jornalet

 

Etiquetas

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pitaluga
2.

França, país dels dreches de l'òme-que-parla-sempre-francés-o-globish.

  • 7
  • 1

Escriu un comentari sus aqueste article