Bandièra01 1180x150: Comuna de Tolosa

Actualitats

Condemnat a perpetuitat lo darrièr dels “Beatles” de l’Estat Islamic

Lo grop èra especialament conegut per la mesa en scèna de las execucions dins de sadics vidèos de propaganda

| Reuters

Tèxte legit

Un jutge federal dels Estats Units condemnèt divendres passat a perpetuitat lo jihadista El Shafee Elsheikh, de 34 ans, qu’integrava una cellula de quatre ciutadans britanics coneguda coma los “Beatles”, dins l’autoproclamat Estat Islamic (EI). L’an declarat colpable de la sequestracion e l’assassinat de quatre ciutadans estatsunidencs, dos jornalistas, James Foley e Steven Sotloff, e dos trabalhadors umanitaris, Peter Kassig e Kayla Mueller. Elsheikh foguèt arrestat en 2018 per las milícias curdas de Rojava e es lo membre de l’EI de pus naut rang condemnat pels tribunals als Estats Units. Per tal de lo poder jutjar als Estats Units, lo ministèri public acceptèt la demanda del Reialme Unit de lo condemnar pas a la pena capitala.
 
Lo jutjament d’Elsheikh se debanèt a la prima e durèt doas setmanas.  Enterin, mai d’un èx-ostatge d’aqueles “Beatles” expliquèron las torturas patidas, coma de simulacions d’estofament, de tabasadas sistematicas e mai de torturas psicologicas. Totes senhalèron qu’aquela còla britanica de l’EI se destriava per “son sadisme” e descriguèron Elsheikh coma lo “pus fòl” e lo “pus brutal”. Elsheikh parlèt pas a cap de moment e son avocat desmentiguèt que faguèsse partida dels “Beatles” de l’EI mas assegurèt qu’èra “un simple luchaire” de l’organizacion.
 
Actius en Siria entre 2012 e 2015, los quatre membres d’aqueles “Beatles”, totes eles radicalizats a Londres, son acusats d’aver supervisat la detencion d’almens 27 jornalistas e trabalhadors umanitaris. L’escais de “Beatles” lor donèron los quites ostatges a causa de lor accent britanic. Lo grop èra especialament conegut per la mesa en scèna de las execucions dins de sadics vidèos de propaganda.
 
Elsheikh es lo sol dels quatre “Beatles” terroristas jutjat als Estats Units après qu’Alexanda Kotey se declarèt colpable en setembre, tanben de la mòrt d’aqueles quatre ciutadans estatsunidencs, e foguèt condenmat a perpetuitat. Quant als autres dos “Beatles”, Aine Davis es encarcerat en Turquia e Mohammed Emwazi foguèt abatut en Siria en 2015.
 
 
 
abonar los amics de Jornalet

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article