Actualitats
Chile a votat “non” a la nòva Constitucion
Los chilens an votat una proposicion de Constitucion que deviá despassar lo legat de Pinochet
Tèxte legit
Desenant sabèm pas exactament quina serà la seguida. Teoricament se pòt crear una autra convencion per elaborar una autra proposicion de Constitucion e la sometre tornarmai a referendum. Mas la drecha prepausa que la nòva Constitucion siá redigida pel parlament.
Lo tèxt que los ciutadans an refusat enfaciava lo drech d’abitatge e— sens o dire espeificament— d’avortament, a mai prepausava que Chile foguèsse considerat coma un estat plurinacional qu’acceptèsse lo drech dels pòbles indigènas de decidir lors pròpris afars. Las reformas tanben pertocavan las institucions: desapareissiá lo Senat e se cambiava l’estructura del sistèma judiciari.
Lo president chilen, Gabriel Boric, aviá remarcat lo caractèr istoric del plebiscit. Ara, ditz que se contunharà de trabalhar “amb mai de vam, de dialòg, de respècte e d’amor fins a arribar a una proposicion que convenga a totas e totes”.
L’oposicion a la Constitucion proveniá pas solament de la drecha, qu’es estada totalament contrària, mas tanben de qualques sectors de l’esquèrra.
Redigida per 155 ciutadans, dont 17 indigènas
La proposicion de Constitucion refusada l’aviá redigida una convencion ciutadana de 155 membres dont 17 indigènas: sèt mapoches, dos aimaras e, en rason d’un representant per cada pòble, un rapanui, un quíchoa, un atacama, un diaguita, un còla, un kaweska, un iagan e un chango.
En octòbre de 2020, los chilens votèron a una larga majoritat de remplaçar la Constitucion actuala, escricha jos la dictatura d’Augusto Pinochet. A mai, gaireben lo 80% dels votaires decidiguèron tanben que la nòva Constitucion foguèsse redigida solament per de ciutadans sens que i aguèsse de representants parlamentaris.
Los anhelos de cambio y dignidad exigen a nuestras instituciones y actores políticos que trabajemos con más empeño, diálogo, respeto y cariño, hasta arribar a una propuesta que nos interprete a todas y todos. Para allá vamos. Que viva la democracia y que viva Chile! pic.twitter.com/f5rQv2G5mJ
— Gabriel Boric Font (@gabrielboric) September 5, 2022
Articles relacionats
Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.
#1 Fau veire tanben coma s'es fach la campanha... L'oposicion a laa constitucion reçaupèt 200 còp mai de sòus que lo sostèn e l'extrèma drecha, que s'aliguèt còntra la constitucion ambé la drecha e lei liberaus, an desplegat fòrça de fauçei novèlas sus lo contengut de la constitucion.
Podèm pas dire qu'èra un exemple de democracia.
« Lo pòble unit jamai serà vençut ! » : qun tristum !!!
Vòstre comentari es a mand d’èsser validat. Per terminar lo procès de validacion, vos cal encara clicar sul ligam qu’anatz recebre per e-mail a l’adreiça qu’avètz indicada.
Escriu un comentari sus aqueste article
Senhala aqueste comentari