Lo tribunal de la vila d’Arusha, en Tanzania, ordenèt dimars passat la remesa en libertat de 24 personas de la comunautat massai après que lo ministèri public n’aguèt retirat las denóncias per assassinat, a causa de la mòrt d’un policièr dins las protèstas que se tenguèron en junh passat mentre que lo govèrn cercava de fòrabandir 70 000 personas de lors tèrras per i far una resèrva naturala.
 
Los jutges an adoptat aquela decision après que lo procuraire diguèt que contunhariá pas l’enquista sus la mòrt del policièr. De dirigents massais avián mandat una letra als govèrns dels Estats Units, del Reialme Unit e dels estats de l’Union Europèa en demandar lor ajuda per èsser pas expulsats de lors tèrras ancestralas, ont se voliá establir una resèrva de caça gerida per una societat dels Emirats Arabis Units.
 
 
Una repression policièra fòrça violenta
 
Los afrontaments ont moriguèt l’agent se tenguèron a Loliondo, dins lo districte septentrional de Ngorongoro, frontalièr amb Kenya. Dins l’encastre de l’espandiment dels airals naturals protegits a aperaquí 1500 km², lo govèrn de Tanzania voliá desplaçar environ 70 000 massais qu’i demòran.
 
Los afrontaments nafrèron mai de 30 personas e se detenguèt los 24 caps massais. Alavetz, The Guardian raportava que de centenas de personas s’èran amagadas dins los bòsques per fugir la violéncia, e segon Survival International serián estats plusors milièrs. Lo mèdia sud-african News24 assegurava aver vist un rapòrt que detalhava que las personas nafradas avián de cambas rotas, de nafraduras de balas e de plagas al cap.
 
Segon la BBC, a qualques unes dels ferits lor calguèt cercar l’assisténcia medicala en Kenya perque Tanzania lor la rebutèt. L’organizacion Forest Peoples assegurava qu’un d’aqueles massais moriguèt voidat de sa sang mentre qu’èra menat devèrs lo país vesin.
 
 
Una resèrva de caça jos l’escampa de preservar la natura
 
Lo govèrn de Tanzania afortís que la creissença de la populacion umana e de lors tropèls en Ngorongoro menaça la vida salvatja dins la region. La presidenta del país, Samia Suluhu Hassan, avertissiá que la preséncia umana dins la zòna metiá lor “patrimòni mondial en perilh” e prepausava de relotjar los abitants de la region.
 
Plusors fonts, compreses lo jornal The Guardian, lo Grop Internacional de Trabalh pels Afars Indigènas (IWGIA) e l’Oakland Institute, rapòrtan que lo govèrn tanzanian se servís d’aquel argument per crear una resèrva orientada devèrs lo torisme de grand standing ont se poirà caçar e que serà gerida per una companhiá dels Emirats Arabis Units.
 
 
Mai d’un còp fòrbandits de divèrsas tèrras
 
Los massais denóncian que lor pòble es mai d’un còp fòrabandit de divèrsas tèrras dempuèi lo començament del sègle XXn: primièr, pendent los primièrs dos decennis del XXn, per las autoritats britanicas en Kenya, per far de plaça als colons europèus. E mai tard, en Tanzania, per la creacion de pargues coma los de Serengeti o Ngorongoro.
 
Los massais son a l’entorn de 2 milions de personas, dont aperaquí 1,2 milion demòran en Kenya e 800 000 en Tanzania. Constituisson una minoritat dins los dos estats.