Bandièra01 1180x150: País Invisible

Actualitats

Iran: an executat lo primièr condemnat per las protèstas

Li disián Mohsen Shekari e aviá 23 ans. L’avián condemnat per “crimes de guèrra” per aver nafrat un policièr

Tèxte legit

An executat en Iran lo primièr presonièr condemnat oficialament per las protèstas que trebolan lo país après la mòrt de la jove curda Jina Amini. O anoncièron las autoritats iranianas dijòus de matin. Li disián Mohsen Shekari e aviá 23 ans. 
 
Dins una senténcia sevèra, la Cort Suprèma d’Iran aviá refusat l’apelacion de l’avocat en considerar qu'èra pas valida ni justificada. L’avián condemnat per “crimes de guèrra, per aver nafrat “intencionalament” un agent de la seguretat amb un cotelàs e per aver blocat una carrièra de Teheran.
 
Per fin de prononciar la senténcia, los jutges s’èran fondats sus de supausadas declaracions de testimònis de la manifestacion qu’aurián dich que los quites manifestants èran espaurits per la preséncia del jove armat.
 
A la debuta d’aquesta setmana, las autoritats iranianas an raportat que cinc autres detenguts son estats condemnats a mòrt per lor implicacion dins la mòrt d’un agent de seguretat pendent las protèstas. Pel meteis delicte onze menors son estats condemnats a de longas penas de preson.
 
 
Se perseguís los mètges
 
Los mètges iranians asseguran que las fòrças de l’òrdre tiran sus la cara e las partidas dels manifestants, çò rapòrta The Guardian. Explican quitament que los manifestants recebon de còps de fuòc tirats de près e sovent dirèctament dins los uèlhs.
 
A mai, los mètges afortisson que los que suènhan de manifestants nafrats son perseguits e qu’o devon fan en secret, compresas d’operacions amb los lums amortats per èsser pas descobèrts.
 





abonar los amics de Jornalet
 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Franc Bardòu
1.

Dins una senténcia "sevèra" ? Dins l'article, l'autor maneja l'eufemisme amb ferrocitat !… Aquò es d'exterminacion preventiva de tota enveja de levar lo nas, un metòdi plan classic de terrorisme d'estat. En mòde minor, los estats neoliberals aplican lo meteis metòdi per dissuadir los movements de contestacion anticapitalista de s'accentuar. En mòde minor : non tuan : nassan, gasan, trucan a còps de barra, e t'espetan d'uèlhs o de mans. Una autra mena d'eufemisme benlèu…

Lo mai clar dels estats, democratics o non, de la volontat dels pòbles, se'n chautan e tot. Digam qu'en Iran per exemple, aquò vei mai clar qu'endacòm mai.

  • 2
  • 0

Escriu un comentari sus aqueste article