La justícia metrà en examen l’èx-president francés Nicolas Sarkozy per abús de feblesa de Liliane Bettencourt, segon çò qu’a indicat l’avocat del politician, Thierry Herzog, qu’a qualificada la decision judiciària d’“incoerenta” e d’“injusta”; e mai a anonciat que i presentarà recors immediatament e que ne reclamarà la nullitat.

Segon çò que se faguèt public en 2011, Liliane Bettencourt, la nonagenària eiretièra de l’empèri cosmetic L’Oréal, a una deméncia mixta e una malautiá d’Alzheimer dins un estat moderadament sevèr. L’investigacion judiciària vòl esclarzir se Sarkozy profechèt de l’estat de la milionària e s’abusèt de la siá fisança per li traire d’argent destinat a finançar la campanha que lo menèt a l’Elisi en 2007.
 
L’èx-president compareguèt ièr al Palais de Justícia de Bordèu e aguèt un acarament amb lo majordòm de Bettencourt, Pascal Bonnefoy. Los jutges volián determinar quantes còps anèt Sarkozy a l’ostal de la milionària pendent la campanha electorala e saber s’abusèt de la siá feblesa per obténer de fonzes. L’èx-president francés confirmèt una vesita, del temps que lo majordòm afirmèt que i anèt maites còps.
 
La suspicion que Sarkozy poiriá aver aprofechat los problèmas mentals de Bettencourt venguèt de Claire Thibout, anciana comptabla de Bettencourt. En 2010, la femna declarèt a la polícia que, tres ans abans, l’administrator de la familha, Patrice de Maistre, li aviá demandat 150 000 èuros en efectiu per los donar al clavaire de la campanha electorala de Sarkozy.
 
Lo cas se descobriguèt per azard dins una enquèsta parallèla tocant una disputa familiala que la filha de Bettencourt, Françoise Meyers, portèt a la justícia.