L’Associacion Bord’òc, qu’amassa los estudiants occitanofòns e occitanofils de l’universitat Bordèu-Montanha, coorganiza dijòus que ven, 16 de març, una jornada d’estudis pels doctorands sus las practicas, la recèrca e la vulgarizacion de las lengas pròprias de la region, valent a dire l’occitan, lo basco e lo peitavin-santongés. La jornada s’adreiça als doctorands que desconeisson lo camp de las lengas minorizadas del país mas es dobèrta al public exterior per videoconferéncia. Los qu’i vòlon participar pòdon mandar un e-mail a asso.bordoc@gmail.... La jornada se tendrà en francés.
 
Al programa i a una conferéncia d’un cercaire del CNRS que parlarà de son projècte de collectatge e difusion de la paraula en las lengas minorizadas de l’estat francés. Puèi, la còla de Bord’òc presentarà son exposicion “Vous parlez peut-être occitan sans le savoir!" (Benlèu parlatz occitan sens o saber). La matinada s'acabarà amb una taula redonda a l'entorn de l'espectacle de vulgarizacion istorica "Le testament d'Aliénor - théâtre-rock" escrit per Katy Bernard e Sandrine Biyi.
 
Al vèspre, doctorands e ensenhaires-cercaires parlaràn de lors trabalhs e malhums de recèrca sus l’encastre de la region dicha Nòva Aqutània e lor “relacion” amb lo public.
 
Enfin, la jornada se finirà amb un espectacle prepausat per Bord'Òc que met en musica las òbras de Jean de la Fontaine e del trobador Rigaut de Berbezilh. Lo concèrt se farà a l’anfiteatre Cirot de l’universitat bordalesa.