Bandièra01 1180x150: Comuna de Tolosa

Actualitats

crotz-tolosaCreated with Sketch.GasconhaVal d'Aran

Eth Parlament de Catalonha ratifique er occitan coma lengua dera educacion en Aran

Era sindica d’Aran demanèc ua modificacion dera lei dera educacion entà “evitar interpretacions erronèes”

Ara demana dera sindica d’Aran, Maria Vergés, eth Parlament de Catalonha a modificat era lei en tot ratificar er occitan coma lengua veïculara en ensenhament non universitari en Aran
Ara demana dera sindica d’Aran, Maria Vergés, eth Parlament de Catalonha a modificat era lei en tot ratificar er occitan coma lengua veïculara en ensenhament non universitari en Aran

Tèxte legit

Eth Parlament de Catalonha aprovèc dimèrcles passat ua modificacion dera lei der usatge des lengües ena educacion entà especificar que s’arreconeishe er occitan coma lengua veïculara enes centres educatius d’Aran.

Era lei en qüestion s’auie aprovat en junh de 2022 dempús qu’era justícia espanhòla imposèc ara Generalitat de Catalonha eth 25% de castelhan ena escòla, mès eth hèt de remplaçar era nocion de “lengua veïculara” damb es concèptes de “lengua curriculara” e “lengua educatiua” desvelhèc indignacion ena Val d’Aran. Ara, ara demana dera sindica d’Aran, Maria Vergés, eth Parlament de Catalonha a modificat aquera lei en tot ratificar er occitan coma lengua veïculara en ensenhament non universitari en Aran. Ena sua intervencion defenec qu'eth Conselh Generau volie evitar interpretacions erronèes e declarèc qu'eth Conselh Generau non auie cap d’auta gessuda que defener-la coma lengua veïculara e generar aqueth debat entà modificar era lei dera educacion de Catalonha.

Era sindica tanben rebrembèc en sòn parladís qu’era situacion der aranés non ei bona pr’amor qu’eth sòn usatge sociau ei dejós deth 20%. Per aquera rason, Vergés defenec tanplan qu’ère indispensable de proposar aquera modificacion dera lei.

Eth resultat dera votacion dera modificacion dera lei a estat: 104 vòtes favorables (ÈRC, Junts, PSC e En Comun Podem), 17 abstencions (CUP, Ciutadans e grop mixte) e 9 vòtes contraris (Vox).

 

 

 

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article