La presidenta de la region nomenada Occitània, Carole Delga, e lo president de la Generalitat de Catalonha, Pere Aragonès, signèron dimècres passat a Barcelona un partenariat estrategic entre los dos territòris que prevei de tornar connectar Tolosa e Barcelona amb un tren de granda velocitat, una connexion que los dos govèrns regionals considèran “indispensabla”. Son los Ferrocarrils (camins de fèrre) de la Generalitat de Catalonha (FGC) qu’an elaborat l’estudi del projècte e lo considèran viable economicament.

Lo partenariat, que serà en vigor durant quatre ans, se bastís sus quatre grands aisses: un pache verd, los dreches socials e l'egalitat, la mobilitat e lo desvolopament economic e la politica euromediterranèa. De soslinhar lo besonh de combatre la secada ensems dins l’encastre tanben de l’Euroregion Pirenèus-Mediterranèa.

Promocion e defensa de l’occitan e del catalan

En mai de tot aquò, lo partenariat pertocarà tanben las politicas de la mar e de la pesca, lo camp numeric, l’educacion e sustot un engatjament clar de promocion e de defensa de las lengas pròprias dels dos territòris: l’occitan e lo catalan.