Bandièra01 capçalera  1180x150: Novestivada

Actualitats

Revòlta en Senegal après la senténcia contra l’opausant Ousmane Sonko

Sonko a denonciat l’afar coma de lawfare (instrumentalizacion de la justícia) e una part del plan del president, Macky Sall, per empachar que se presente a la presidenciala de 2024

Tèxte legit

Almens 15 personas mòrtas es lo tragic bilanç de la revòlta en Senegal sortida de las protèstas contra la senténcia de dos ans de preson per l’opausant Ousmane Sonko, que se poirà pas presentar a l’eleccion presidenciala prevista per febrièr de 2024. L’avián acusat de viòl e de menaças, e foguèt relaxat, mas fin finala l’an condemnat per “corrupcion de menors”. Sonko es un dirigent del partit dels Patriòtas de Senegal per lo Trabalh, l’Etica e la Fraternitat (PASTÈF).

Ousmane Sonko es lo principal opausant del president Macky Sall. Sa detencion en març de 2021 ja provoquèt una colèra populara de las dimensions impressionantas amb l’incendi e lo pilhatge de botigas e de sits, mai que mai d’entrepresas francesas. Ara, tornarmai, lo govèrn a desplegat l’armada e a restrench la connexion a internet.

Sonko a denonciat l’afar coma de lawfare e una part del plan del president, Macky Sall, per empedir que se presente a la presidenciala de 2024.

 

Encara la colonizacion

 

La detencion de Sonko foguèt en 2021 lo detonador d’una revòlta sociala que se prevesiá dempuèi longtemps dins un país paure, que fòrça estatjants ne son forçats d’emigrar e ont encara, jos lo trauma de la colonizacion, los abitants veson que las grandas poténcias economicas del país coma l’energia e los supermercats son francesas.

De soslinhar que Senegal es recentament vengut membre del Gas Exporting Countries Forum (GECF), (Forum dels païses exportators de gas), escaissat “l’OPEP del gas”. A jonch la lista dels païses productors de gas natural liqueficat (GNL) coma Russia, Qatar, Argeria, Nigèria... La produccion deuriá començar a la fin de 2023. Tanben ongan deu començar l’extraccion de petròli.

Etiquetas

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article