Tot ei prèst tara 29u edicion dera corsa “Aran per sa Lengua”, qu’aurà lòc dimenge que ven. S’agís d’ua des hèstes revendicatiues mès populares dera Val d’Aran ena quau es participaires s’amassen d’ora de maitin enes tres extrèms deth país: Montgarri, Les e eth Pòrt de Vielha, e partissen a pè o en tot córrer, e en tot minjar o en tot béuer amassa laguens es viles deth percors. Ei de soslinhar aguest esperit conviviau que mèrque era jornada de tot un país en movement pera lengua.

Ath ser, toti s’amassen ena plaça dera glèisa de Vielha, a on se harà a sénter es revendicacions der aranés ena societat, e entà qu’era lengua demore veïculara ena educacion publica. Coma cada an, s’autrejarà eth prèmi Lengua Viua e se clauarà era jornada damb un concèrt de Nadau, que, coma cada an, harà a dançar as joeni e as mès grani en encastre d’un concèrt fòrça animat.

Emission en dirècte de País Invisible

Era còlha de País Invisible comence era dusau sason damb ua emission en dirècte en Vielha en tot retransméter tot çò que se viu ena plaça deth temps qu’arriben es corsaires, se hèn es parladisses, s’autrege eth prèmi e comence eth concèrt de Nadau. Se poderà seguir en dirècte sus YouTube e Twitch.

País Invisible ei un videopodcast que cèrque de hèr a conéisser Occitània ath public catalan. Produsit pera Associacion entara Difusion d’Occitània en Catalonha, qu’amie a bon tèrme Jornalet, País Invisible ei dirigit e presentat per Zep Armentano damb era collaboracion de Ferriòl Macip e David Valls. Era emission ei venguda pro populara en tot obtier tres prèmis de prestigi: eth prèmi de joventut dera Euroregion, eth prèmi Sonòr dera melhora produccion e eth prèmi dera Comunicacion Locau 2023 ena categoria de melhor contengut àudio.

Era dusau sason prevei episòdis mès longui e damb fòrça mès contenguts sus Occitània, er occitan, era literatura, era istòria e es istòries deth país. Entà amià’c a bon tèrme ei aviada ua campanha de micromecenatge.