Bandièra01 1180x150: País Invisible

Actualitats

París: una manifestacion de liceans per las lengas autoctònas davant l’Assemblada Nacionala

Mentre que cinc liceans seràn entenduts dins lo grop parlamentari “Lengas e culturas regionalas”, un acamp exterior reclamarà la modificacion de l’article 2 de la Constitucion

París: una manifestacion de liceans per las lengas autoctònas davant l’Assemblada Nacionala
París: una manifestacion de liceans per las lengas autoctònas davant l’Assemblada Nacionala

Tèxte legit

Cinc liceans seràn entenduts deman a miègjorn a l’Assemblada Nacionala francesa dins lo grop “Lengas e culturas regionalas”. A aquel meteis moment, i aurà un acamp sus la plaça parisenca d’Édouard Herriot, davant la bastissa parlamentària, que s’i mobilizaràn especialament de jovents d’Occitània, de Corsega, d’Alsàcia, de Bretanha e del Bascoat. L’acamp seguís la crida del collectiu Per que Viscan Nòstras Lengas (PQVNL) qu’es plan inquiet dels mejans insufisents afectats a l’ensenhament en aquelas lengas e d’aquelas lengas, malgrat l'adopcion en abril de 2021 de la lei de proteccion e promocion de las lengas minorizadas, coneguda coma Lei Molac.

Los manifestants vòlon reclamar una evolucion de l'article 2 de la Constitucion francesa, que consagra a l’ora d’ara lo francés coma sola lenga de la Republica, per tal d'obténer un estatut oficial per las autras lengas autoctònas. Dins aquel sens, PQVNL se mòstra preocupat pels dos articles de la lei que los censurèt lo Conselh Constitucional. Concretament, los magistrats considerèron anticonstitucional l’article 4, qu’oficializa la possibilitat d’ensenhament immersiu de las lengas territorialas, e l’article 9, qu’autorizava que de prenoms aguèsson de signes grafics qu'existisson pas en francés, coma la “ñ” del breton e los accents pròpris de l’occitan.

Lo collectiu ramenta que l’article 2 de la Constitucion foguèt adoptat per luchar contra l’anglicizacion creissenta (Lei Toubon) mas qu’a l’ora d’ara servís pas que per reprimir l’usatge de las lengas dichas regionalas.

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article