Bandièra01 1180x150: País Invisible

Actualitats

Marine Le Pen s’opausa a la lei andorrana del catalan

La deputada ultradrechista assegura que la proteccion de la lenga catalana met en perilh lo francés

Marine Le Pen s’opausa a la lei andorrana del catalan
Marine Le Pen s’opausa a la lei andorrana del catalan

Tèxte legit

La parlamentària neofaissista Marine Le Pen critica la recenta lei de politica lingüistica d’Andòrra qu’exigís que los novèls residents e los que desiran de renovelar lor permés de residéncia ajan un nivèl basic de lenga catalana, çò rapòrta lo Diari d’Andorra. Le Pen exprimís son oposicion a aquela mesura, en la qualificant de “discriminacion” contra la lenga francesa en Andòrra. Dins una question adreiçada al ministre francés d’Euròpa e dels afars estrangièrs, Stéphane Séjourné, la deputada ultradrechista soslinhèt lo “ligam istoric” entre los andorrans francofòns e França.

Le Pen i avertiguèt d’eventuals “efièches negatius” de la nòrma sus de sectors economics coma lo torisme e las botigas en pretendent qu’aquò poiriá amendrir l’usatge del francés dins aqueles domenis. La novèla lei andorrana cèrca d’implicar las institucions e las entrepresas dins la proteccion del catalan, sustot pr’amor de l’aument de l’immigracion dins lo país pirenenc.

La dirigenta ultranacionalista francesa tanben demandèt al ministre son vejaire sus la lei andorrana en exigissent qu’aparèsse la francofonia en Andòrra. D’autre caire, voliá tanplan saber se l’executiu de Gabriel Attal aviá idèa d’intervenir dirèctament al près del govèrn andorran per cambiar la situacion.

La lei andorrana establís una exigéncia minimala de coneissenças lingüisticas pels novèls residents novèls e pels que renovèlan lor permés de residéncia. Los qu’an pas un nivèl A2 de catalan devon seguir un cors de 20 oras. Lo govèrn andorran cèrca aital de revirar la tendéncia segon la quala la primièra atencion es dispensada dirèctament en espanhòl, sustot dins las botigas e los restaurants.

 

França a una lei similara per protegir lo francés

 

De son latz, lo pòrtavotz del govèrn d’Andòrra s’es mostrat indiferent e a soslinhat que las relacions institucionalas amb França son geridas pel president Emmanuel Macron, qu’a eiretat del ròtle de coprince dels ancians comtes de Fois, e non pas per l’Assemblada Nacionala francesa. A mai, fa remarcar qu’Andòrra progrèssa dins lo reequilibratge amb lo país vesin, en recordant que França a una lei similara per protegir lo francés. Benlèu auriá pogut apondre que l’estat francés fa pas res per protegir lo catalan, malgrat lo risc imminent de son escantiment en Catalonha Nòrd.

 

 

 

 

 

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

K.Pujol
7.

Fins ara aquesta nos a pas encara dich que l'us del catalan al Principat, al païs valencian e a las Balears metia lo francés (!) en perilh mas saique tardarà pas d'o far !

  • 14
  • 2
Gerard Joan Barceló Pèiralata
6.

Lo problèma es pas tant vòstras idèas racistas e ultranacionalistas francesas mas lo fach que coma tot tròl ultradrechista, fasètz servir d'adreiças electronicas inventadas. Es normal qu'ajatz pas lo coratge de vòstras opinions, l'ultradrechista es generalament un coard.

  • 14
  • 8
Lo pastisson
5.

Come de costuma, lo jornalet a suprimit un messatge que va pas dins sa direccion ideologica.

Eslogan nou : Lo jornalet, vostre jornal autoritari

  • 10
  • 23
xipo Bossac
4.

De qué venon far los faxistas dins aquestas paginas..encara de propaganda.....Demoratz dins vòstres mediàs preferits... e buzzats tant que podètz...
Mas daissem-nos entre monde de còr que son capables de tot levat d' òdi.

  • 8
  • 12
Pitèas
3.

Alara caldriá un cèrt nivèl de francés en França e pas un cèrt nivèl de catalan en Andòrra? E lo catalan seriá un dangièr pel francés? Aquela empega!
E l'Aliot que fa tot çò que pòt a Prepinhan per escafar lo catalan.
Una còla de nazilhons vos disi.

  • 31
  • 15

Escriu un comentari sus aqueste article