Lo Congrès Permanent de la Lenga Occitana presenta Ninon, un portal consagrat als enfants que fan d’estudis bilingües en francés e occitan. Ninon es estada realizada a la demanda del departament dels Pirenèus Atlantics, es en gascon, e s’adreiça als parents e professionals de la petita enfança en ofrissent una tièra d'aisinas per integrar l’occitan dins la vida vidanta dels mainatges.

Ninon es una iniciativa pionièra coma portal complet dedicat al bilingüisme per enfants en edat prescolara e infantila. Los usatgièrs pòdon accedir a de ressorsas que facultan l'usatge jornadièr de la lenga, en contribuissent a la creacion d'un encastre occitanofòn.

Que prepausa Ninon?

Ninon prepausa una varietat de ressorsas adaptadas a de situacions e besonhs desparièrs, dont:

• Un lexic sonòr illustrat: vocabulari en francés e occitan, amb illustracions e àudios.

• De tutorials en vidèo: de scènas de la vida vidanta amb lor vocabulari especific (lo manjar, lo banh, lo cambiament de panèls, etc.)

• De catalògs de ressorsas: d'istòrias, de musicas e d’activitats en occitan pels mainatges.

• Un directòri de professionals: de contactes per aprene l'occitan e ofrir immersion lingüistica.

Ninon en chifras

Lo portal compta 1700 mots de vocabulari, 29 tutorials en vidèo, 350 ressorsas per partejar d’istòrias, 130 per de cançons, 140 per d'activitats e 200 professionals dins son directòri. Tot aquò dins 34 airals tematics.

Beneficis del poliglotisme

E mai la tòca de Ninon siá d’ajudar als enfants occitanofòns a viure dignament en lor lenga, lo comunicat de premsa del sit precisa qualques avantatges del poliglotisme: los enfants que creisson amb mai d’una lenga desvolopan de capacitats cognitivas addicionalas, comprenon plan melhor las autras lengas romanicas, aprenon mai aisidament d’autras lengas e aquerisson una cultura rica. A mai, lo mestritge de l’occitan los connècta amb lo país e lor identitat.

De vesitar: ninon.eu