L’associacion culturala Nissa Pantai, activa dempuèi 54 ans per la promocion de la lenga e de la cultura del País Niçard,  es estada exclusa ongan de la Fèsta dei Mai organizada als jardins dei Arenas del quartièr de Cimier, a Niça. Pel primièr còp dempuèi 2007, l’associacion a pas obtengut l’atribucion d’un taulièr dins aquela celebracion populara, prevista los 1r, 4, 11, 18 e 25 de mai.

L’anóncia foguèt comunicada lo diluns 28 d’abril, çò que daissèt pauc de marge de reaccion. L’exclusion, qualificada d’«injusta» per l’associacion, a provocat estonament e indignacion entre sos mai de 200 sòcis. En consequéncia, Nissa Pantai a depausat un recors juridic en nom de l’egalitat de tractament: «Venèm d’aver l’acòrdi per aver lo banc a la fèsta, mas li es un emplegat municipal que demanda de levar li bandieras de Nissa e d’Occitània», çò a dich a Jornalet Cristòu Daurore, vicepresident de l’associacion. «Totun, refudam de levar li bandieras». L’associacion prepausa una conferéncia de premsa uèi, 1r de mai, a 8h30 al jardin dei Arenas de Cimier per explicar sa posicion.

Nissa Pantai mena un trabalh remirable dins la transmission de la lenga occitana al País Niçard, dins l'espaci vivaroalpenc e endacòm mai: organiza de corses, a una emission de ràdio, publica de libres, fa de teatre, de vesitas guidadas en occitan, de balètis e participan activament al Carnaval niçard e a fòrça animacions culturalas coma lo campionat del mond del Palhasso o lo festival Vocàlia dals Palhons. L’associacion es tanben coneguda per son ligam amb l’artista Ben Vautier, que concebèt lo lògo de lor ràdio associativa.

Aquela exclusion arriba dins un contèxt mai larg de reduccion de las subvencions e de refús d’animacions de part de la comuna.