En omenatge al centenari de la naissença de Marcela Delpastre, Sirventés presenta l’espectacle “D’una lenga l’autra” que fa viure la votz e l’imaginari d’una de las mai grandas poetessas de la literatura occitana. Creacion de Monique Burg (votz) e François Dumeaux (païsatges sonòrs e musica), la proposicion es un viatge poetic, entre paraulas, sons e musica, en francés e en occitan.

Poetessa e païsana, observaira atentiva del Mond, Delpastre escriviá: “E traçarai mon caminòl, trobarai ma rota, ma rota miá, lo camin de ma saba. Marcarai la marca de mon pas.” Dins l’espectacle, aqueste camin interior pren forma a travèrs d’un lengatge mesclat, que passa d’una lenga a l’autra dins un meteis poèma, e d’una paraula a una nòta.

De païsatges sonòrs, tan naturals coma abstraches, altèrnan entre enregistraments, archius sonòrs, impressionismes auditius o frequéncias electricas, creant una escotada contemplativa e sensoriala. Los cants e lo violon tradicionals, inspirats per las cançons que Delpastre cantava en familha, completan l’experiéncia. Poesia e musica s’entremesclan, dins un omenatge simple e universal, que rend compte de l’amor de l’autora pel vivent e pel Mond. Un libreton de traduccions serà mes a disposicion del public.

L’espectacle farà una virada en 2025 amb las primièras datas ja confirmadas:

• 10 de mai a Bordèu (Grava)
• 6 de junh a Tula (País de Tula)
• 17 de julhet a Crespinh (Segalar Roergàs), a l’Ostal Joan Bodon
• 25 de julhet a Sent Jòrgi Negre Mont (Montanha Lemosina)
• 8 d’agost a Sent Gervais d’Auvèrnha (Combralha)
• 20 d’agost a l’estanh de Vaciviera, Peirat lo Chasteu (Montanha Lemosina)
• 27 de setembre a Chambaret (Montanha Lemosina)
• 3 de novembre a Carcassona (Carcassés)
• 21 de novembre a Castèlgelós (Marmandés)

Per mai d’entresenhas o per de contactes professionals:

• Comunicacion: Laurie Privat: +33(0)7 86 29 47 81 – contact@sirventes.com
• Difusion: Catherine Serve +33 (0)6 60 50 53 83 – conte.rue@sirventes.com