A l'entorn de 4000 personas se son concentradas davant lo Capitòli de Tolosa per far un omenatge a las victimas de Mohamed Merah. "Soi pas estonat, perque aquò a tocat a totes. Aquò concernís pas solament los negres, los josieus e los arabis", a declarat Alexandre Sztulman, lo president de l'Union dels Estudiants Josieus en Miègjorn-Pirenèus. A la concentracion s'es desplegada una granda bandieròla que sus ela se podiá legir en occitan, en francés, en arabi, e en ebrèu: "Convivéncia: egalitat, pluralitat, dignitat".

 

Al delà, aquesta dimenjada es per la memòria. Lo CRIF e las organizacions josievas "apèlan totes los ciutadans a una caminada silenciosa en omenatge a las victimas dimenge a 17 oras a la sortida del replanat de Bèlmont fins als endreches del masèl per i pausar de flors e de messatges, sens bandièras ni bandieròlas. Un sol mot d'òrdre: "Per la defensa de las valors republicanas, totes amassa contra lo terrorisme, l'òdi e l'extremisme!"