Bandièra01 1180x150: Comuna de Tolosa

Actualitats

Endavant, un nòu grop d’accion e d’agitacion per l’occitan

| Jean Marc Pellet

Occitània a, dempuèi pauc de temps, un nòu grop d’accion e d'agitacion en favor de la lenga e de la cultura occitanas. S'agís d’Endavant (EdV), que visa la maximala proteccion legala de la lenga occitana per que siá declarada oficiala en tota Occitània e que se n’estimule la siá reconeissença e lo sieu usatge social. L’associacion, ara per ara, preferís s'aculhir pas als avantatges de la lei 1901 perque considèra qu'aital serà mai liura e mens dependenta.


Dins lo plan d’accion decidit a la darrièra assemblada, Endavant se prepausa d’èsser un movement d’agitacion e d'accion dirècta per la lenga e la cultura del país, e balhar un caractèr popular a la revendicacion occitanista. Lo grop vei fòrça clar los sieus limits e vòl pas far lo prètzfach cultural que fan las autras associacions, que las apèla “complementàrias”. Entre las accions previstas dins los meses a venir i a divèrsas presentacions publicas e la campanha “Tolosa en occitan”, que se lançarà tre lo mes de setembre e qu'aurà per tòca que los transpòrts publics de la ciutat mondina ajan una politica lingüistica coerenta.
 
Coma es previsible dins una organizacion nascuda fa pauc de temps, una de las prioritats del grop nòu serà l'integracion de membres novèls e la siá expansion territoriala. Dins aquel sens, Endavant farà endavant un esfòrç per se sarrar del locutors novèls de l’occitan. Al costat, aquel grop d’accion preten aumentar las intradas a tèrme cort per poder aquerir de material per las siás accions revendicativas. Per aquò far produsirà de material divèrs, coma per exemple de camisetas de vendre entre lo simpatizants de l’organizacion.

Lo grop es present sus Internet per la siá pagina de Facebook.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article