Bandièra01 1180x150: Comuna de Tolosa

Actualitats

De scientifics chineses que descobriguèron la transformabilitat dels metals aurián viatjat dins l’avion desaparegut

Lei Sheng, Jie Zhang e Jing Liu publiquèron en genièr passat un estudi sus un aliatge que podiá assumir divèrsas formas, se mòure e se transformar. Segon qualques mèdias aqueles scientifics viatjavan dins lo vòl MH370 de Malaysia Airlines

Los fisicians chineses Lei Sheng, Jie Zhang e Jing Liu, de l’Universitat de Tsinghua de Pequin, publiquèron en genièr passat un estudi sus la transformabilitat dels metals, que podián assumir divèrsas formas, se mòure e se transformar. Segon los scientifics, aquel estudi poiriá implicar dins l’avenir lo dessenh de robòts que càmbian de forma e tanben la creacion d’una infinitat d’organs artificials pels umans. Aqueles tres fisicians aurián viatjat dins lo vòl MH370, l’avion de Malaysia Airlines que desapareguèt lo 8 de març passat, segon qualques mèdias.
 
E mai se lo metal liquid mai conegut es lo mercuri, qu’es fòrça toxic, i a d’autres metals e aliatges que son liquids a temperatura ambienta e que son pas brica nocius. En aquel cas, en concret, se tracta d’un aliatge de galli, indi e selèni, amb una temperatura de fusion de 10° C aperaquí. Aquel aliatge a atirat darrièrament l’atencion de la comunautat scientifica pr’amor que se pòt emplegar per la refrigeracion dels microprocessors e quitament dins de tecnologias d’impression modèrnas.
 
Aqueles scientifics chineses capitèron de far qu’aquel metal liquid assumiguèsse de formas simplas mejançant lo depaus d’una primièra pellicula d’aquel aliatge sus l’aiga e amb l’aplicacion d’un camp electric. Amb de camps electromagnetics, los cercaires capitèron de far que lo metal prenguèsse una forma esferica. Segon eles, aquel efièch foguèt lo resultat de l’equilibri entre la tension superficiala dins lo metal liquid e las fòrças electricas aplicadas a sa superfícia. Al delà, en emplegant las fòrças de tension superficiala e las fòrças electrostaticas, la còla chinesa capitèt de mòure e de far virar l’esfèra de metal sus l’aiga, en la far prene, en seguida, la forma d’un vèrme, en tot modular lo camp electric.
 
Aquela descobèrta poiriá far realitat lo terrible robòt T-1000 del filme Terminator 2, qu’a una esqueleta intèrna de metal liquid podent assumir la forma de quin objècte o persona que siá. Sa natura liquida lo fa quitament immun a las balas.

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Gerard Joan Barceló Pèiralata
3.

#2 Lo cristianisme ensenha que l'òme se separa de Dieu per son orguèlh (lo mite adamic), l'idèa que se crei Dieu el meteis, mèstre del mond e de la natura, e ne vesèm las tristas consequéncias: la vida sus nòstra planeta es en perilh. Doncas, òc, l'òme a d'èsser mai umil fàcia a l'univèrs, malgrat sa capacitat de pensar l'univèrs, segon lo grand filosòf occitan Pascal.

  • 1
  • 0
lachaud pierre dournazac
2.

L'umanitat es confrontada au progres tecnologic. Tot lo monde vei ben que l'umanitat pod pus continuar sens consciença. La consciença deu pas esser l'afar daus sols scientifics o ben daus caps d'estats mas de 7 miliards d'esser uman.
Avem viscuts sos la lei de la separacion. I avia Diu e sas creaturas, los òmes, los animaus.. .La sola relacion se fasia apres la mort quand minjan los pissenliechs per las raiçs. La séparacion entrainet una patologia de la separacion. Las causas, , los omes, los animaus son separats los uns dus autre e d'un fonccionement coperatif de tot l'univers. Quo faguet naisser l'egoisme, l'individualisme, las rivalitats dins la familha. Agueran lo catolicisme, los musulmans, lo bodisme que se separeran; I aguet daus schismes dins la religions, de las gueras de religion, de las gueras tot cort. L'umanitat deu trapar un virar, au jorn d'anuech, si vol botar fin a la guerra e a la corsas aus armements. Li fau una novela consciença que dit que tot dins l'univers depend l'un de l'autre e qu'una pensada, una accion de tota persona a una influença sur lo tot. Anem, bona pensada!

  • 2
  • 0
Pascau
1.

Interessant, aqueths estudis!
E alavetz; que seré un complòt internacionau contra los terminatòrs chinés?

  • 5
  • 1

Escriu un comentari sus aqueste article