Bandièra01 1180x150: Comuna de Tolosa

Actualitats

crotz-tolosaCreated with Sketch.Comtat de NiçaCostiera Niçarda

Hélène Pastor es mòrta a l’espital per sas feridas de balas

Son menaire, Mohamed Darwich, èra ja mòrt lo 10 de mai

Hélène Pastor moriguèt dimècres passat a l’Espital Sant Ròc de Niça, en consequéncia de las feridas de balas que ne foguèt atacada lo 6 de mai passat. Son menaire, Mohamed Darwich, 64 ans, que foguèt ferit encara mai grèvament, moriguèt lo 10 de mai.
 
Hélène Pastor, amiga intima del prince Albèrt II e membre d’una de las familhas mai ricas de Mónegue, l’ataquèron davant l’Espital L’Archet de Niça, lo 6 de mai, a l’entorn de 19h. Pastor, dins sos mai de setanta ans, èra anada a l’espital per vesitar son filh Gildo Pallanco Pastor, e quand sortissiá en veitura del pargatge de l’espital, lai foguèt fusilhada per dos tiraires en emboscada que l’esperavan. Segon los testimònis, los malfactors fugiguèron a pè.
 
Los enquestaires, qu’an consultat la familha, demòran fòrça perplèxes sul mobil d’aqueste doble crime en banda organizada. L’informacion judiciària, que lo ministèri public de Marselha dobriguèt, es ja requalificada de “temptativa d’assassinat” a “assassinat”.
 
A l’ora d’ara i a una persona en detencion provisòria dins la preson de Lei Baumetas, a Marselha. S’agís d’un cantatgista qu’auriá apelat qualques còps la familha Pastor. L’òme pretendiá conéisser d’informacions sul comanditari e las voliá escambiar contra d’importantas somas d’argent.
 
Hélène Pastor fasiá partida d’una familha de las mai ricas del Principat de Mónegue, que possedís una enòrma part del patrimòni immobilièr del país. Son filh, Gildo Pallanco Pastor, lo que sa maire vesitèt a l’espital quand foguèt atacada, es lo president de Venturi Automobiles, lo constructor de veituras d’espòrt electricas. Lo fraire d’Hélène Pastor, èx-president del club de fotbòl AE Mónegue, que moriguèt en febrièr passat, èra un ric òme d’afars.


Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article