Bandièra01 1180x150: Comuna de Tolosa

Actualitats

La Copa del Mond de Fotbòl a començat amb de protèstas e de caumas

| Frente Independente Popular - RJ
Comencèt ièr la Copa del Mond de Fotbòl 2014 en Brasil, e se finirà dins un mes, après 64 partidas entre 32 seleccions estatalas. Mas, s’òm poiriá considerar Brasil coma lo país del fotbòl, lo solelh e lo divertiment, la realitat es plan desparièra. Aquela Copa del Mond comença amb de caumas, de protèstas e de polemicas. La despensa publica es fòrça nauta e se reclama que las prioritats socialas sián la defensa dels dreches umans amb la lucha contra la pauretat, lo crime e la violéncia. La quita Federacion Internacionala de Fotbòl (FIFA) critiquèt los retards dins las òbras dels estadis, ont moriguèron 8 obrièrs per manca de mesuras de seguretat.
 
Las primièras protèstas arribèron arunan, pendent la Copa de las Confederacions 2013. Lo mond manifestèron contra l’encariment del transpòrt public. Mas lo govèrn a pas escotat los manifestants, e los prèses son asfixiants.
 
Dins los quartièrs mai paures, las dichas favelas, òm a reagit a la repression. Per amagar lor existéncia davant lo Mond, las autoritats an ensajat de dispersar aqueles quartièrs cap a de zònas perifericas e la polícia i agís amb fòrça violéncia. La reaccion son d’afrontaments violents e de barricadas pertot.
 
L’inaguracion de l’enveniment esportiu comencèt tanben amb de caumas de transpòrt. Fins a dimècres i aguèt la cauma dins los transpòrts publics de São Paulo e ièr s’i apondèron los menaires d’autobús de Fortaleza e Natal, los salariats dels aeropòrts de Rio de Janeiro e los agents de trafec de Fortaleza. Los collectius de salariats protèstan contra lors salaris basses e lors condicions de trabalh, mas sustot demandan la readmission dels caumaires licenciats pendent l’annada solament per aver protestat.
 
De fach, la constatacion que los brasilièrs son a pagar un eveniment que ne poiràn pas gaudir, pr’amor que los prèses an montat fòrça, es aquò d’aquí qu’aluca las protèstas.
 
 
Protèstas dels indigènas
 
Pendent l’annada, las protèstas de las divèrsas nacions indigènas de Brasil son estadas nombrosas. Es de remarcar la revendicacion de la delimitacion de las tèrras, una revendicacion de l’Articulacion dels Pòbles Indigènas de Brasil (APIB), l’organizacion qu’amassa de centenats de grops indigènas del país american. Se reclama la derogacion de las nòrmas “que restrenhon los dreches indigènas”, la “fin de la criminalizacion” de las comunautats autoctònas e l’aplicacion de politicas publicas de santat e educacion.
 
Segon lo cap indigèna Neguinho Truká, lo govèrn brasilièr deuriá despensar l’argent “en santat, educacion e abitanças” abans d’organizar un eveniment “que pòrta pas de beneficis”.




Tear gas in the air on World Cup opening dayper reuters

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
3.

Damatge que i aja encara lo Pelé e pas lo Socrates no Brasil. Aqueste auriá pas fach los comentaris cinics d'aquel suls mòrts de las construccions d'estadis. Segur que li auriá brandit las pelhas a la Roussef e a tota la clica!

  • 1
  • 0
antalya
2.

#1 Vertat! cal de jòcs e de cirque !

  • 3
  • 0
Brunon
1.

Nos fan cagar aquelas putas de paures e d'obrièrs. Que se calen e que digan pas res pendent aquela Copa del Mond de Fotbòl ! Que la ''fèsta'' comence ! Pffff Vergonha a totes aqueles piòts de suportaires que fan lo viatge ailà. Los jogaires que los mespreson en mai d'aquò ...

  • 5
  • 2

Escriu un comentari sus aqueste article