Bandièra01 1180x150: Comuna de Tolosa

Actualitats

Rugbi XIII: los Gigants aiman tròp la cargolada

| Mortonstalker
Malaisit d’èsser lo cronicaire de las partidas dels Dracs e, encara mai, los entraïnaires d’aquela formacion, a veire los cambiaments de comportament de l’esquipa d’una partida l’autra. Tota la setmana, los jogaires s’èran dit conscients de l’enjòc de la partida de dimenge a Huddersfield amb l’objectiu de se ganhar la seisena plaça al classament e de reçaupre a Brutus pel primièr torn de las pelhòfas. Dins las primièras minutas, los Gigants perdèron tres balons dins lors 10 mètres, mas los catalans marquèron pas. Al contrari, se trapèron lèu menats 14-0. Dintrèron al vestiari sus un 14-6 aprèp un ensag volontari d’Eloi Pelissièr. Lo segond temps se debanèt del meteis biais: paumas mancadas, passas dins las cavilhas, defensa flaca e lo magician escocés Danny Brough en fàcia que s’arregalèt de destabilizar encara mai los Sang e Aur amb sos còps de pè millimetrats: 38-16 a la sortida e sèt ensages encaissats per una esquipa que se disiá noirida de son punt fòrt, la defensa! De qué se replegar tot vergonhós dins sa cauquilha! En plaça d’anar quèrre la seisena plaça, vaquí que tornarmai se pausa d’un biais angoissós la question de demorar dins los 8 primièrs per se qualificar per las pelhòfas.
 
E una primièra part de responsa vendrà lèu, que la partida venenta dels Dracs es programada aqueste divendres 1r d’agost a 9 oras de la nuèit amb la venguda dels Lops de Warrington a Brutus. Unes Lops que seràn tanben animats d’un esperit de revòlta aprèp la desfaita d’aqueste dimenge sus lor pelena fàcia a Wakefield: 40-26. De notar tanben la victòria de Bradford fàcia a Wigan, 16-8, mentre que Salford resistiguèt bravament a Leeds, 18-22.
 
De son costat, la Federacion ven de publicar la lista de 37 jogaires d’Elèit apelats en estagi al CREPS de Tolosa los 8 e 9 d’agost per dire de completar la formacion francesa que jogarà lo Torneg Europèu a la fin d’octobre (que serà a basa de Dracs), mas tanben per tornar faire espelir una esquipa de França A que rescontrarà l’Africa del Sud a la fin del mes de mai de 2015.
 
En partida internacionala, Itàlia a batut Russia 22-18 dins l’encastre de la Copa d’Euròpa B; a Toronto, en Carribean Carnival Cup, Canadà venç Jamaïca 24-20 mentre que, mercé a un tombat en tota fin de partida, los Barnhall Butchers venon campions d’Irlanda amb una victòria 25-24 suls Treaty City Titans. De notar qu’en Austràlia, lo Sonny Bill Williams jogarà pas de tot lo mes d’agost qu’es estat victima d’una fractura del poce.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article