Bandièra01 1180x150: Comuna de Tolosa

Actualitats

Rugbi XIII: Yorkshire a Wembley

Jòia: Leeds en finala de la Cup!
Jòia: Leeds en finala de la Cup!
La finala 2014 de la Cup metrà a las presas lo dissabte 23 d’agost doas formacions de Yorkshire: Leeds e Castleford; dissabte, a Saint Helens, amb lo retorn de suspension de son menaire de jòc Kevin Sinfield que passèt las 4 transformacions dels ensages marcats, los Rinocèros de Leeds prenguèron lo pas suls Lops de Warrington: 24-16. Dimenge a Leigh, fàcia a Widnes, Castleford marquèt dos ensages tre las dètz primièras minutas e menava 14-0 a la pausa per véncer fin finala 28-6. Las doas esquipas seràn bravament motivadas per la finala, que lo trofèu es pas anat a Leeds dempuèi 1999 e a Castleford dempuèi 1985.
 
D’aquel temps, aprèp quauques jorns de repaus e la represa de l’entraïnament de divendres, los Dracs montèron respirar lo bon aire de la montanha dissabte a Matemala. Un còp de mai, podèm reprene la sansònha e dire qu’es important d’anar quèrre una resulta positiva divendres de ser a Salford per assegurar quasi definitivament la qualificacion per las pelhòfas.
 
Dimars passat 5 d’agost, los campions tolzans reprenguèron lo camin de l’entraïnament collectiu mentre que lor integracion al campionat anglés demòra un mistèri e sembla remandada a l’an pebre. Lo pilar fijian Eloni Vunakece es partit jogar jos d’autres cèls. Per contra, se nòta l’arribda del jove anglés de 22 ans Danny Hulme, jogaire polivalent: arrièr, mièg o talonaire. L’objectiu de l’esquipa es de renovelar sa sason passada: ganhar campionat e Copa. Primièra partida pel Tolosa Olimpic: lo 13 de setembre amb la recepcion de Limós.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article