Aqueste 15 d’agost, los Dracs jogavan cò dels Diables roges de Salford. Lo president del club, En Kokash, a montat una còlha de jogaires-estelas extraordinària sul papièr mas pietadosa sul terrenc, vist que se trigòssa entre la 10a e la 12a plaça al classament, plan luènh dels sòmis de cap de fila de la Superliga. Mas, un jorn ça que la, la salsa finiguèt per prene. Malastrosament pels catalans, aquel jorn foguèt divendres! Los Dracs dobriguèron la marca amb un ensag de Pomeroy e puèi, tornèron a la mòstra de totas lors decas vengudas tròp costumièras e doblidèron totas las bonas resolucions: pas de jòc al pè, traucs en defensa, incapacitat de marcar dins los temps fòrts... e l’ensag “classic” de la darrièra minuta abans la pausa (22-4 per Salford). Dins lo segond temps, la partida s’equilibrèt. Anderson entretenguèt las esperanças per un ensag, mas los Diables puntèron dos còps darrèr la linha catalana e lo mesclanha catalan de Salford, lo Théo Fages, marquèt l’un d’aqueles ensages. A la fin, Duport e Henderson ramenèron la marca a 34-22.
 
Los Dracs sèrvan la 7a plaça, vist que Widnes a perdut a Huddersfield 14-28 e que Wigan, amb un ensag de Charnley sus la còrna, arranquèt l’egalitat 14-14 cò d’Hull KR que demòra a dos punts dels Dracs:
   
E dins un mes, i aurà una esquipa que serà pas qualificada per las pelhòfas.
 
Dissabte 30 d’agost, los Dracs reçaupràn los London Broncos qu’an ganhat enfins una partida (40-36 contra Leeds, tant qu’a i èsser, mas los Rinocèros pensavan ja a la finala de la Cup), aniràn puèi cò d’Hull KR per una partida al cotèl e reçaupràn Castleford lo dissabte 13 de setembre. Inutil de dire que las victòrias venon mai qu’indispensablas per se trapar pas fin finala a la plaça del piòt: la novena!
 
Aqueste dissabte 23 d’agost, a 3 oras del vèspre en Anglatèrra (4 oras a l’ora occitana), se jogarà a Wembley la finala de la Cup entre Leeds e Castleford.
 
 
 
Alan Roch