Bandièra01 1180x150: Comuna de Tolosa

Actualitats

Presentan al Parlament de Catalonha 750 000 signaturas per l’independéncia

Los peticionaris invòcan lo drech de peticion e demandan al Parlament de declarar unilateralament l’independéncia se se pòt pas votar lo 9 de novembre

| ACN
L’Assemblada Nacionala Catalana (ANC) liurèt ièr al Parlament de Catalonha aperaquí 750 000 peticions per que la cambra catalana declare l'independéncia se se pòt pas celebrar lo referendum del 9 de novembre o se “se barra totas las pòrtas”. Los 750 000 mots de bilhet liurats son de requèstas individualas eissidas de la campanha “signa un vòte per l’independéncia”.
 
An signat aquelas demandas 706 000 personas amb document d’identitat espanhòl, dont la majoritat de catalans, 12 000 son d’estrangièrs amb residéncia dins l’estat, e 8000 an signat amb passapòrt. Totes an mai de 16 ans.
 
Lo document que lo mond an signat reclama als politicians “de far tot çò que poiràn, d’agotar totas las vias per far lo vòte”, e en cas que se pòsca pas far, de considerar cada demanda signada “coma se foguèsse un vòte per declarar l’independéncia”, en acòrdi amb lo drech internacional de peticion. Dins aquel sens, vòlon que las 750 000 signaturas se considèren “coma un vòte, dins lo sens del desir” de personas que se son “engatjadas” per l’independéncia de Catalonha en fornissent lors donadas personalas.
 
Las caissas amb los documents arribèron al Parlament dins un camion e, de segur, aquel fach encoratjarà los debats sus la lei qu’es a se debatre ara, que se deu aprovar a la fin de la setmana e que permetrà lo referendum consultatiu sus l’independéncia de Catalonha lo 9 de novembre. Aquela lei, lo govèrn espanhòl a anonciat que la contestarà al Tribunal Constitucional per empedir lo vòte.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Ernèst Guevara Jr. L'Avana
1.

Aquela lei, lo govèrn espanhòl a anonciat que la contestarà al Tribunal Constitucional per empedir lo vòte. Non mas, qué creson, aqueles ciutadans catalans ? Se creson en democracia ? Dins un estat que s'i demandariá avejaire al pòble ??? E perqué pas s'anar imaginar que lo pòble siá sobeiran, tant que i son ?…

  • 8
  • 0

Escriu un comentari sus aqueste article