Dempuèi la setmana passada lo servici meteorologic britanic, lo Met Office, a un nòu departament de seguiment del temps que fa dins l’espaci. Lo Centre de Prediccion Meteorologica Espaciala s’es dobèrt a Exeter (Anglatèrra) e a per tòca de seguir la meteorologia de l’espaci en tot moment. “Lo Met Office Space Weather Centre nos ajudarà pas solament a prevenir l’impacte del temps espacial” (d’erupcions solaras, de tempèstas geomagneticas…), en mai d’aquò ne “beneficiaràn las entrepresas britanicas restacadas a l’indústria de l’espaci e l’economia en general”, segon lo ministre Greg Clark.
 
Los camps magnetics, las radiacions, las particulas e la matèria expulsada pel Solelh pòdon afectar la nauta atmosfèra terrèstra e lo nòstre camp magnetic, e produire d’efièches multiples coma d’interrupcions en las comunicacions de ràdio, lo GPS e los rets electrics, e al delà pòdon causar de damatges a las naus espacialas e als satellits.
 
Lo centre es finançat pel govèrn del Reialme Unit e i trabalhan d’expèrts britanics e estatsunidencs, en seguida de l’acòrdi de collaboracion que David Cameron e Barack Obama signèron en 2011.