Bandièra01 1180x150: Comuna de Tolosa

Actualitats

Rugbi XIII: Totsants de las illusions perdudas

Kouma Samson, lo jove internacional neozelandés (junior), marca tres ensages per sa primièra partida amb Carcassona
Kouma Samson, lo jove internacional neozelandés (junior), marca tres ensages per sa primièra partida amb Carcassona

Doas marridas novèlas pel XIII occitanocatalan dins la setmana de Totsants: los Blaus daissan lo trofèu europèu als escoceses e la Rugby League refusa l’inscripcion de l’esquipa junior dels Dracs dins lo campionat.


Los Pols plumats
 
Los Blaus partiguèron dins lo nòrd d’Anglatèrra amb un objectiu: batre de 18 punts los escoceses e ganhar atal lo Trofèu europèu e la qualificacion pel Torneg de las Quatre Nacions de 2016. Tot se passèt plan dins lo primièr temps: 38-6 pels Blaus a la pausa. Mas, dins lo segond temps, la maquina se desmarguèt, trantalhèt e pleguèt: pas mai de punts marcats e, a la fin, los escoceses tornèron a la marca: dos ensages dins las 5 darrièras minutas. 38-22 pels Blaus: Diferéncia: 16 punts e los escoceses al Paradís. Los irlandeses malgrat una victòria 46-14 contra Galas poguèron pas cofar sul pal los Còrs-Braves. Seriá vertadièrament temps que Federacion, Dracs e esquipas d’Elèit se concertèssen per aver una esquipa nacionala de tria e competitiva e que daissèssen de costat los problèmas personals e autras bisbilhas segondàrias: mas es benlèu tròp demandar.
 
 
Pas de catalans en Junior Academy
 
Autra marrida novèla: la Rugby League a pas retenguda la candidatura de l’esquipa junior dels Dracs pel campionat 2015. La rason: certanas esquipas anglesas an pas volgut pagar los fraisses de desplaçament a Perpinhan. Los Dracs se trapan amb 35 joves en formacion que faràn seguir amb l’esquipa primièra dins los desplaçaments en Anglatèrra e unas formacions juniors anglesas faràn lo viatge en Rosselhon, mas se jogaràn que de partidas amicalas. La bona volontat e l’engatjament catalans son pas pagats en retorn. Per 2016, benlèu?
 
 
Las Quatre Nacions a la còrna
 
Doas supèrbas partidas se debanèron aquesta dimenjada dins lo Torneg de las Quatre Nacions. Dissabte, dins un ambient festiu, a Whangarei (nòrd de la Nòva Zelanda), los Kiwis esperèron la 78a minuta per prene lo pas suls samoans: 14-12.
 
Dimenge, a Melbourne, los angleses petèron lo fuòc dins lo primièr temps amb una vertadièra espròva de fòrça, 12-4; mas los Cangorós comptèron amb las individualitats per batre sul fial la formacion europèa: 16-12. La tresena jornada serà decisiva per la qualificacion per la finala del 15 de novembre: se los australians son larjament favorits contra Samoa (dimenge 9, a Wollongong), tot demòra dobèrt entre Anglatèrra e la Nòva Zelanda (dissabte 8, a Dunedin).
 
7 sus 7 per Carcassona
 
En mai del plaser de veire las doas partidas de l’autre cap del Monde, la partida de dimenge entre Dragonets e AS Carcassona nos tornèt balhar vam e moral. Rescontre vodat del tot al tot a l’ofensiva amb 10 ensages a la clau: 6 pels Canaris, 4 pels locals: 33-20 pels audencs. Lo novèl vengut neozelandés, Samson Kouma (pelses corts!), signèt tres ensages dels Jaune e Negre: un bon recrutament. Atal, Carcassona acaba las partidas anar de la primièra fasa pas qu’amb de victòrias. Son dalfin es lo campion Tolosa qu’es anat batre un Lesinhan malautejaire al Molin: 32-12.
 
Vilanuèva (3a) contunha son susprenent percors amb una victòria sul fial fàcia a Palau: 20-18. Limós va véncer en Vauclusa al tèrme d’una partida indecisa: 30-26 contra Avinhon. Dimenge, per la primièra jornada de las partidas retorn, Palau reçauprà Tolosa, Avinhon anirà a Sant Estève e Vilanuèva a Limós. A Carcassona, aprèp un omenatge a la memòria de Lolò Mazon —un jogaire mitic de l’ASC, de la granda virada de 1951 mas tanben grand resistent— e un brave caçolet, dèrbi entre l’AS Carcassona e Lesinhan, una partida que la Federacion retransmetrà en dirècte e en estriming sus son sit, mas res non val d’anar veire las partidas suls estadis!
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article