En NRL e Super-Liga, l’ora es venguda de la represa dels entraïnaments e se règla las darrièras questions de transfèrts de jogaires e dels contractes novèls o renovelats. Doncas, sus las pelenas, l’actulitat bèla tretzista èra lo debanament de la detzena jornada del campionat Elèit.

Dètz sus dètz per Carcassona
 
La pluèja tombava fina sus l’airal de la Pepinièra aqueste dissabte en fin de vèspre per l’oposicion entre Carcassona e Palau. Lo cap de fila fasiá dintrar unes novèls jogaires per daissar un torn de pausa a quauques quadres. Los catalans foguèron valents, mas la maquina audenca demorèt de longa mèstra del jòc: 18-0 a la pausa, 30-6 al final amb tres ensags per l’arrièr Lucky Luke Towers que marca mai lèu que son ombra (de veire lo sit novèl de l’ASC XIII)!
 
Dimenge, a Avinhon, Vilanòva mostrèt sos limits actuals e encaissèt un 42-12 que marca l’urgéncia d’un subresaut per confirmar la bona entama de la sason e la qualificacion envisatjada per la pola bèla.
 
A Limós, Tolosa tustèt d’entrada per un remandadís als 20 m lèu jogat e un primièr ensag per Keirralah que foguèt lo rei de la pelena. A fòrça de coratge, maugrat la flaquesa dels butaires, Limós demorèt dins la partida e s’acontentèt d’un inutil punt de bonus defensiu: desfaita 40-28.
 
La partida importanta se teniá a Sant-Estève entre los Dragonets e Lesinhan. Dins la formacion catalana, figurava lo jove provençal Joffret, retorn d’Anglatèrra. Los catalans dobriguèron la marca per Robin, mas a la pausa los Singlars de Corbièras avián l’avantatge 20-8 que confirmèron dins lo segond temps amb doas penalitats e un ensag (de Duggan que fasiá sa dintrada) transformat: 30-14 e pas de bonus defensiu pels catalans. Un pichon punt que poiriá faire la diferéncia a l’ora de la fin de la primièra fasa. Mas los Dragonets se pòdon manténer dins la corsa a la qualificacion se van ganhar dimenge a Limós per la sola partida al programa que la dimenjada èra puntada coma temps de ratrapatge.
 
L’ASCarcassona XIII aprofita del dimars de Santa Catarina per organizar sa quina bèla .
 
 
Albi e Lescura en Elèit-2, Avinhon en juniòrs e Tolosa en femininas an tot ganhat!
 
En Elèit 2, aprèp 7 jornadas, Albi a pas coneguda la desfaita dins la pola Èst e se qualificarà per las polas de brassatge Elèit1/Elèit 2 de la segonda fasa. Serà acompanhat pels catalans de Baó o per la resèrva del Tolosa Olimpic, los Tolosa Broncòs. Dins la pola Oèst, es lo vesin tarnés de Lescura que mena la corsa sens cap de desfaita. La segonda plaça se jòga entre doas vièlhas coneissenças del monde tretzista: Sant Gaudenç e Vilafranca de Roergue. En juniòrs, son los joves del SO Avinhon que tenon lo ròtle d’esquipa sens desfaita. Son seguits a distància per Limós, Carcassona e lo XIII catalan.
 
En Nacionala 1, dins la pola Èst, Roana es primièr mas sèt equipas se tenon en 4 punts. Dins la pola Oèst, aprèp 7 jornadas, Clairac a pas coneguda la desfaita. Los audencs perseguisson la formacion aquitana: Ferrals, Vilanòva de Menerbés e Vilagalhenc-Argon son a qualquas longors del cap de fila.
 
En femininas, la pola Elèit ramosa tres formacions: Tolosa-Ovalia, Biganòs e Lescura.
 
Tolosa, venceiras dins Tarn 8-6, pren la primièra plaça al classament. A l’escalon inferior, repartidas en 3 polas, 18 equipas participan al campionat nacional. Dins la pola C, l’AS Carcassona e Montpelhièr comptan 3 victòrias aprèp 3 partidas.
 
7 equipas prenon part al campionat Elèit de 13-fautuèlh e Caurs, venceire dels Dracs catalans 41-34, pren lo cap de classament aprèp doas jornadas.
 
Atal, a totes los nivèls, lo XIII presenta partidas dobèrtas e plan interessantas que balhan vam a las competicions.
 
 
 
 
Alan Roch