Bandièra01 1180x150: Comuna de Tolosa

Actualitats

Los atacants de Charlie Hebdo e quatre ostatges mòrts. Al Qaida a revendicat l'atemptat

Après l’assaut de la polícia a la fabrica de Dammartin-en-Goële e al supermercat parisenc de la Porte de Vincennes



Après tot un jorn de percaces a París e a l’entorn, los autors de l’atemptat contra lo setmanièr Charlie Hebdo e de l’assassinat d’una policièra son estats tuats. La polícia a fach un assaut simultanèu als dos ponches ont s’èran fortificats.
 
D’un costat, a l’èst de París, en un supermercat josieu de la Porte de Vincennes, ont lo terrorista Amedy Coulibaly reteniá qualques ostatges. Coulibaly èra ja suspècte d’aver tuat ièr una policièra a París.
 
D’un autre costat, dins una estampariá de la zòna industriala de Dammartin-en-Goële (Illa de França), s’èran fortificats los fraires Kouachi, presumits autors de l’atac de Charlie Hebdo que causèt dotze mòrts.
 
Fin finala, los tres suspèctes son mòrts, e tanben quatre ostatges del supermercat, segon la polícia.
 
Coulibaly èra intrat dins lo supermercat a miègjorn en tot prene divèrsas personas coma ostatges; o faguèt en essent acompanhat de sa companha Hayat Boumeddiene. Se suspècta que Coulibaly es tanben l’autor de l’assassinat d’una policièra municipala ièr, en la banlèga parisenca. La polícia aviá detengut dos parents de Coulibaly.
 
Es vèrs 17h que comencèt l’assaut del Grop d’Intervencion de la Gendarmariá Estatala (GIGN) al sit de Dammartin-en-Goële ont i aviá los fraires Kouachi, que son mòrts. Qualques minutas puèi, tanben lo GIGN asalhiguèt Coulibaly dins lo supermercat e lo tuèt. Quatre ostatges del supermercat son mòrts dins l’assaut.
 
Segon de fonts policièras, Coulibaly e los fraires Kouachi fasián partida de la meteissa cellula islamista. De fach, los fraires Chérif e Saïd Kouachi èran citats sus una lista estatsunidenca que lor interdisiá l’accès al territòri american.
 
Èran recercats per la polícia francesa dempuèi l’assaut de la redaccion de Charlie Hebdo, dimècres passat. Demest las dotze personas tuadas ailà, i a cinc dessenhaires satirics celèbres: Cabu (Jean Cabut), Georges Wolinski, Charb (Stéphane Charbonnier), Tignous (Bernard Verlhac) e l’occitan Philippe Honoré. Tanben foguèt assassinat l’economista occitan Bernard Maris. 
 
Lo setmanièr aviá recebut de menaças en 2012 quand aviá consagrat sa primièra pagina a las manifestacions del mond musulman contra un filme que caricaturava lo profèta màger de l’islam, e n’aviá publicat tanben de caricaturas. Un an abans, la redaccion tanben èra estada atacada amb de coctèls Molotov en seguida de la publicacion d’un numèro especial amb una caricatura de Maomet.


Revendicacion d’Al Qaida
 
Al Qaida de la Peninsula Arabica auriá dirigit l’atemptat, segon un comunicat qu'an mandat a Associated Press.

 
D’ostatges a Montpelhièr
 
Un autre malfactor es intrat en una joielariá al centre de Montpelhièr en prenent doas personas en ostatges. Una còla del GIPN es sus plaça. Sembla que se tracte d’un bracatge. 






Aassaut del Grop d’Intervencion de la Gendarmariá Estatala (GIGN) dins lo supermercat ont i aviá Coulibaly




Aassaut del Grop d’Intervencion de la Gendarmariá Estatala (GIGN) al sit de Dammartin-en-Goële ont i aviá los fraires Kouachi

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article