Bandièra01 1180x150: Comuna de Tolosa

Actualitats

Rugbi XIII: la primièra fasa es plegada

Minuta de silenci abans lo rescontre Palau-Limós
Minuta de silenci abans lo rescontre Palau-Limós
Coma totes los esportius, los tretzistas an dit lor pena en saludant las victimas dels atemptats e an exprimit lor sosten a la libertat d’expression: de minutas de silenci se faguèron abans la debuta de las partidas, que se vesiá los arbitres portar una marca negra sus la marga del malhòt. L’espòrt, e lo rugbi, son d’endreits dobèrts a totes: es util de o tornar afirmar un còp l’autre.
 
 
Un darrièr torn que daissarà de traças
 
Dissabte de vèspre, Tolosa metèt la maquina en marcha per prene lo pas suls Dragonets: 48-16. Suspresa en serada a Domèc: la cap de fila Carcassona, amb una esquipa rejovenida e la manca de qualques quadres, podiá res contra lo nhac avinhonenc e, de mai, pèrd son pilar Pau amb un carton roge autrejat per un arbitre un pauc tròp fiularèl. 47-18 pels vesitaires al planchòt.
 
Dimenge, Palau capita pas a arrestar l’espirala de las desfaitas e pòt res contra Limós: 34-26. Lesinhan ganha contra Vilanuèva: 38-16. Auriá calgut una victòria de 55 punts als aquitans per se qualificar per la pola dels asses. Mas l’FCL a perdut per la sason son dobertura Maxim Benausse tocat al genolh a l’entraïnament.
 
La primièra fasa s’acaba amb aqueste classament:
 
1r: Carcassona, 35 punts
2d: Tolosa, 34 punts
3n: Lesinhan, 28 punts
4n: Dragonets, 24 punts
5n: Limós, 23 punts
6n: Vilanuèva, 22 punts
7n: Avinhon, 16 punts
8n: Palau, 14 punts 
 
Òm tornarà trapar a comptar de la darrièra dimenjada de genièr: Carcassona, Tolosa, Lesinhan e los Dragonets dins la pola bèla.
 
Dins las polas mescladas Elèit1-Elèit 2, la pola 2 agroparà Limós, Palau, Albi e Sant Gaudenç. La pola 3 serà compausada de Vilanuèva, Avinhon, Bao e L’Escura d’Albigés.
 
 
Plaça a la copa
 
aquesta dimenjada, se tendràn los oitens de la Copa; una sola partida entre esquipas d’Elèit 1: Tolosa-Palau (dissabte, 17h30). Un dèrbi es previst a Concas d’Orbièl dissabte de vèspre (15h) entre Vilagalhenc-Argon (Nacionala 1) e l’FC Lesinhan, mentre que Caracssona jogarà dissabte en serada cò d’Albi (19h30).
 
 
Al fenestron
 
Be In Sports ven de tornar signar per 3 ans (sasons 2015, 16 e 17) lo contracte per la difusion de las partidas jogadas pels Dracs a Perpinhan. Los Dracs van disputar doas partidas amicalas abans la represa del campionat: aqueste dissabte 17, a 5 oras del vèspre, recepcion dels London Broncos a Brutus e dissabte 24, confrontacion amb la seleccion del las 3 esquipas d’Aude (Carcassona, Lesinhan e Limós), los Chivalièrs Catars. Una partida que se tendrà a 16h30 a Carcassona (Estadi Domèc).
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article