Bandièra01 1180x150: Comuna de Tolosa

Actualitats

Rugbi XIII: la copa sens suspresa

En rugbi, las suspresas, coma al fotbòl ont Grenòble pòt eliminar l’OM, son de mal imaginar tant la diferéncia es bèla pel ritme, l’endurança e la fòrça entre l’Elèit e los autres nivèls.
 
Encara se’n balhèt la pròva dissabte de vèspre sus l’estadi cocarèl de Concas d’Orbièl entre los pensionaris de la Nacionala 1 de la Liga de Rugbi de Vilagalhenc-Argon e lo CF Lesinhan. Lo vent bufava e, pel cèl, un arcolan portava al public sas nòtas de color dins un mièg oval capitat. La còla de Cabardés dominèt lo primièr quart d’ora que passèt dins la mitat del terren dels Molinièrs. Mas lèu, venguèt l’ora dels contras e de las realizacions pels Verds e Blancs: 28-0 a la pausa. La cordelada d’ensages contunhèt dins lo segond temps. Lo VARL aguèt lo meriti de marcar un ensag de tria amb un còp de pè a seguir dirèctament en sortida de mesclanha. Marca finala: 60-8 pel CF Lesinhan e los aplaudiments del public.
 
Lo tenent del trofèu, lo Tolosa Olimpic, èra menat 10-8 a la pausa, puèi levèt tota illusion a Palau: 38-10. Lo club catalan, oiten de la primièra fasa, se pausa de questions sus son devenir en Elèit 1; çò que, per ricoquets, deuriá faire pausar tanben de questions a la Federacion sul format de son campionat. En serada, l’AE Carcassona teniá a distància Albi: 30-16.
 
Dimenge, los clubs d’Elèit 1 coneguèron gaire de dificultats per se qualificar: Limós venç 94-0 a Realmont; los Dragonets ganhan a Vilafranca de Roergue 64-12; Vilanuèva se desfà de l’autre pensionari de Nacionala 1, Clairac, 46-10; Avinhon va batre sos vesins de Carpentràs 24-8. Sant Gaudenç representarà l’Elèit 2 en quart de finala mercé a sa victòria a L’Escura d’Albigés 27-20.
 
Lo tiratge dels quarts se farà dimars 27 de genièr en fin de vèspre a la Ciutat de Carcassona amb lo concors de la mai tretzista de las ràdios: Ràdio Marselheta.
 
 
Primièra sortida victoriosa dels Dracs
 
Dissabte de vèspre, a Brutus, se descobrissiá la formacion novèla dels Dracs fàcia als London Broncos. Un regrèt pels espectators: l’abséncia d’Scott Dureau e Todd Carney, leugièrament nafrats. Lo parelh de mièges èra doncas constituit de Tomàs Bòsc a la dobertura e de Ian Henderson a la mesclanha. Lo novèl vengut Willie Tonga marcava son primièr ensag sang e aur tre la quatrena minuta. Morgan Escarré e Eloi Pelissièr anavan tanben puntar abans la pausa (16-6 pels catalans). Se los angleses marcavan dos còps dins lo segond temps, tres ensages sang e aur (Pala, Escarré tornar e Pomeroy) permetián als catalans de ganhar 32-16.
 
Novèla partida amicala aqueste dissabte 24 de vèspre pels Dracs. A Carcassona, sus l’Estadi Domèc, a 4 oras e mièja del vèspre, afrontaràn los Chivalièrs Catars, una seleccion de jogaires de las tres formacions audencas d’Elèit. La jornada s’anóncia coma una bèla reüssida: lo sopar del ser animat pel Vincenç Moscato aficha ja complet (900 participants), la logacion de plaças per la partida avança plan, Cristian Almerge interpretarà lo Se canta en dobertura e l’IEO Aude amb la Calandreta de Ciutat ne profeitaràn per distribuir de centenats d’exemplars del Lexicòt occitan-francés dels rugbis. L’occitanista Joan-Francés Saisset, cònsol de Traussan, ne profièita per lançar una associacion XIII-Élus per recampar d’elegits favorables a la promocion del rugbi de XIII.
 
Partida amicala tanben pel Tolosa Olimpic qu’anarà desfisar la formacion de Superliga dels Lops de Warrington. Enfin, aquò’s mitat vertat mitat messòrga. Vist qu’aqueste dimenge 25, Warrington passarà en revista totes sos elements amb l’esquipa bèla que jogarà contra Hull KR e una esquipa segonda contra la formacion occitana.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article