Las platanas del Canal de las Doas Mars se salvaràn gràcias als dons, e non pas a l’argent public de l’estat francés. Segon çò que publicaLe Monde, l’entrepresa Voies Navigables de France (VNF) a amassat mai de 530 000 èuros de dons e se’n felicita. Dempuèi lo lançament de la collècta en agost de 2013, aperaquí tres mila donaires individuals an donat d’argent per valor de 252 000 èuros, del temps que 35 entrepresas an contribuit amb 283 000 èuros. E mai se VNF a pas amassat encara tot çò que cal per salvar los arbres del canal, lo president del Club dels Mecènas del Canal de las Doas Mars, René Bouscatel, a declarat al jornal francés que la tòca es d’arribar a 50 entrepresas mecènas d’aicí a la fin de l’annada.
 
Un campairòl menaça las platanas del Canal de las Doas Mars (oficialament lo “Canal del Miègjorn”) dempuèi 2006: lo chancre colorat. Ataca e tua los arbres en qualques meses. France Info publiquèt en novembre un reportatge sus aquela malautiá, qu’a provocat que s’abatan per desenats las platanas del canal transoccitan.
 
“Dins l’espaci de dos o tres ans, aquò vos seca un arbre. Va fòrça lèu. Al canal i a 42 000 platanas, sèm practicament segurs que totes i passaràn”, çò ditz a France Info Francis Maire, un dels expèrts que gerís lo canal e que son ròtle es d’inspectar los arbres. Sa còla descobrís cada annada “un centenat de fogals novèls”. A l’ora d’ara la solucion es d’abatre totes los arbres.
 
A Tolosa, de cercaires e d’estudiants de l’Institut Estatal de las Sciéncias Aplicadas (INSA) trabalhan per trobar una sòrta de vaccin contra aquesta malautiá que menaça totas las platanas del país.
 
La malautiá arribèt en Occitània pendent la Segonda Guèrra Mondiala amb de caissas de municion estatsunidencas. Aquelas caissas son enterradas jol Pargue Borély, a Marselha, al pè de las platanas. En 1974 s’identifiquèt l’infeccion, que s’es espandida regde e lèu. Lo primièr cas al Canal de las Doas Mars s’identifiquèt en 2006.