Bandièra01 1180x150: Comuna de Tolosa

Actualitats

Los Dracs s’extirpan just de las arpas dels Tigres

Mesfisatz-vos de la contrada de Perpinhan s’avètz lo mal de còr: vos caldrà patir e tresfolir fins als còps de còrna que marcan la fin de las partidas de XIII!


Un tombat decisiu de Scott Dureau
 
Dissabte de vèspre, los Dracs recebián a Brutus los Tigres de Castleford, qu’avián pas encara engolida lor desfacha de la setmana passada fàcia a Wakefield. Los Dracs jogavan sens los pilars Casty e Bosquet tocats a Saint Helens; Todd Carney èra protegit e sa dintrada reportada a la partida del 28 contra Warrington; Tomàs Bòsc daissèt sos collègas al cap d’un quart d’ora, nafrat als adductors. Los Dracs defendián en debuta de partida, mas l’alièr irange Justin Carney puntava dins lo canton. Amb la transformacion: 6-0 pels vesitaires. La partida èra nharruda: los Dracs jogavan dins un pichon perimètre, los esperits s’escalfavan e l’arbitre sortissiá just abans la pausa dos cartons jaunes pels catalans e un pels angleses.
 
A la represa, Dureau interceptava una palma mas metiá lo pè en tòca al moment d’aplatussar. Escarré èra a la recepcion d’un còp de pè inversat del menaire de jòc que transformava l’ensag per metre las esquipas a egalitat. Puèi, Scòtt Dureau balhava amb penalitat l’avantatge als sang e aur. Al tèrme d’un supèrbe movement, lo segonda linha Whitehead marcava. Amb una novèla intercepcion del centre Pomeroy, una fauta de man empachava lo tresen ensag catalan. Pendent la mesclanha que seguissiá, l’alièr Carney traucava e trapava a nautor son centre Tansey: 12-12. Los Dracs capitavan a gerir las darrièras minutas: tombat victoriós per Dureau (77a) e mestritge de la palma. Victòria arrancada als Tigres 13-12.
 
Òm se pòt demandar se la volontat de bastir una competicion amb 12 esquipas en Superliga 1 e amb un sistèma de monta-davala va pas anar contra la qualitat de las partidas. En un mot, se l’enjòc serà pas mai fòrt que lo jòc. Ven als arbitres de faire la guèrra sistematica als marrits gèstes, vistes dins mai d’una partida dins las doas primièras jornadas. En esperant, l’arrièr dels Dracs Morgan Escarré, objècte d’atencions particularas e non-amicalas, deuriá anar demandar de conselhs a d’òmes-cauchó dins los circs que passan per Perpinhan.
 
La partida venenta dels Dracs serà tornar a Brutus lo dissabte 28 de febrièr de vèspre amb la recepcion dels Lops de Warrington. Los quinze jorns venents seràn pas de tròp per melhorar l’eficacitat collectiva e los automatismes.
 
 
Rescontres angloaustralians
 
La dimenjada qu’arriba serà consagrada a la competicion mondiala dels clubs amb tres partidas de tria: divendres, Warrington recebrà los Dracs de Saint George-Illawara; dissabte, partida entre Wigan e los Brisbane Broncos; dimenge, rescontre dels dos campions Saint Helens e los Lapinons de South Sydney. Un regal que serà retransmés per Bein Sports.
 
 
La Copa cambiarà de proprietari
 
Aqueste dimenge, se debanavan los quarts de finala de la Copa Lord Derby. Sant Gaudenç (Elèit 2) opausava una brava resisténcia a Avinhon, mas perdiá 26-6. A Limós, Lesinhan metiá un quart d’ora per trapar sas marcas. Aquò anèt tròp fòrt, tròp aviat pels locals que pleguèron 42-6. A Vilanuèva, l’AE Carcassona esperèt las vint darrièras minutas per prene lo larg: 38-12. La partida mai sarrada se tenguèt sus l’estadi municipal de Sant Estève. Fa una setmana los Dragonets batián Tolosa 20-18 en campionat. Aqueste còp, los catalans tornèron véncer contra los detentors del trofèu: 15-12. Cada esquipa marquèt dos ensages, mas los còps de pè de Joan Guasch faguèron la diferéncia.
 
Las mièjas finalas son programadas per la dimenjada dels 14 e 15 de març sus terrens nèutres e la finala se debanarà lo dissabte 11 d’abril de vèspre a Carcassona.
 
Aquesta dimenjada, lo campionat repren sos dreits amb las partidas Tolosa-Carcassona dissabte e Lesinhan-Dragonets dimenge per çò qu’es de la pola dels Asses.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article