Per Pascas, mai ovala que totes los uòus, la palma de rugbi senhoreja sus tota la planeta Tèrra que se’n cal demandar s’ela tanben es pas ovala!

Pascas reviscòla los Dracs
 
Dijòus, del costat de Wakefield, los Dracs se tornèron faire la santat: sèt ensages (tres per l’alièr Damian Cardace) e victòria fàcia als locals: 40-4 (26-0 a la pausa). Aquel torn del Dijòus e del Divendres Sants valguèt per la victòria d’Hull KR dins lo dèrbi fàcia als vesins d’Hull FC 20-6, la victòria de Widnes 30-10 fàcia a Warrington e, dins un estadi sens una plaça liura de Wigan, la victòria de la formacion locala dins lo revenge de la finala d’octòbre contra Saint Helens: 12-4.
 
Aqueste diluns, los Dracs recebián los Vikings de Widnes a Brutus. Los catalans prenián los afars en man e marcavan lèu fait tres ensages per Elòi Pelissièr mes sus orbita per Whitehead, puèi dos còps pel centre Willie Tonga. A la vintena minuta, Matiàs Palà puntava dins son canton, 22-0, puèi 22-4 a la pausa. Los Dracs baissavan de ritme. Los Vikings marcavan a la represa, mas Pelissièr, aprèp una traucada de Palà, e Cardace, a la recepcion d’una passa al pè de Dureau, tornavan marcar. Lo darrièr ensag anglés cambiava res a la victòria catalana: 32-16 a la granda satisfaccion del public (10 000 espectators) .
 
Amb 4 punts per la dimenjada, los Dracs fan coma los primièrs Leeds. Per contra, Saint Helens coneis una segonda desfaita sus sa pelena e susprenenta: fàcia a Hull FC: 28-20. Los Dracs se tornan plaçar en mitan de tablèu: a la seisena plaça.
 
Dimenge, un brave desplaçament s’anóncia pels Dracs. Direccion: Wigan.
 
 
NRL: desfaitas a l’ostal
 
En Austràlia, en campionat NRL, se jogava la cinquena jornada. Entre Canterbury e Lapinons, la decision se faguèt pels campions amb una penalitat al moment de la còrna: 18-17. Los Roosters perdèron sus lor pelena fàcia a las Làmias de Cronulla: 20-12. Los Lapinons prenon lo cap del classament amb 8 punts, coma Brisbane, venceire dels Titans 26-16, e Newcastle, batut sus sa pelena per St. George: 13-0. De fait, una sola esquipa ganhèt a domicili: Melbourne, que passèt diluns un 30-14 als Combatents neozelandeses.
 
 
Campionat: Avinhon e Limós en quart de finala
 
Dissabte, en rescontre de barratge, Avinhon prenguèt aisidament lo pas suls Catalans de Palau: 38-6. Dimenge, a Limós, los locals metèron mièja ora a prene la mesura dels Laupards d’Aquitània, valents mas en manca de realisme, per ganhar fin finala 27-16.
 
Pels falses quarts de finala (falses, vist que n’i a que dos), la dimenjada dels 18 e 19 d’abril, aurem doncas un dèrbi Lesinhan-Limós e lo rescontre Carcassona-Avinhon. Al pè de Ciutat, òm s’es pagat un moment de crisi aprèp l’eliminacion en Copa e la partida desastrosa a Sant Estève: refús dels jogaires de s’entraïnar dimars, acamp jogaires-entraïnaires-dirigents lo dimècres per patin-patan qualques modificacions dins lo ròtle de cadun per salvar los mòbles e acabar del melhor possible una sason plan començada (dètz victòrias en dètz partidas) e que s’acaba en coa de peis (d’abril?).
 
 
Dissabte de Copa
 
Aqueste dissabte 11 d’abril, doas finalas de Copa se tendràn a l’estadi Domèc de Carcassona. Tre miègjorn e mièja, lo Trofèu Nitard dels juniors serà en jòc entre los joves Canaris e la formacion d’Avinhon: una partida dobèrta e sarrada s’anóncia. A 15h05 (se poirà véser sus France 3 se venètz pas a Carcassona), la finala de la Copa Lord-Derby entre Dragonets e Lesinhan. D’un costat, la joinesa e lo vam catalans; de l’autre, l’experiéncia e lo biais de l’entraïnaire-bruèis Cologni. Pas aisit de designar lo venceire!
 
 
 
 
Alan Roch