Bandièra01 1180x150: Comuna de Tolosa

Actualitats

Carcassona-Tolosa en finala del Campionat

La passa magica de Kevin Naiqama
La passa magica de Kevin Naiqama | NLR

Doas supèrbas mièjas finalas de campionat, lo reviscòl dels Dracs e un ensag d’antologia marquèron la dimenjada tretzista.


Carcassona a la perfeccion
 
Las tribunas dels Minims (Tolosa) van èsser deroïdas e tornadas bastir de nòu. Aquesta vesprada del 25 d’abril, s’enanèron sus la nòta positiva de doas supèrbas mièjas finalas del campionat.
 
La primièra, al còp de doas oras, metiá cap e cap los Canaris e los Dragonets. A Carcassona, es ora de la remesa en causa amb un investiment bèl afirmat dels jogaires e un foncionament novèl del grop d’entraïnaires. Los Dragonets, macats de la desfaita en finala de Copa, devián comptar amb lo despart de l’arrièr Miloudi (signatari a l’ASBH), la montada d’Springer, Pala e Garcia en esquipa primièra. Los catalans marcavan los primièrs sus un ensag long de son ala de Buche, transformat per Guasch. Aqueles sièis punts seràn los primièrs e darrièrs marcats pels Sang e Aur. Los Jaune e Negre prepausèron un jòc animat, amb una alternància requista de las cargas del paquet e de las iniciativas ofensivas dels tres quarts, amb un Gressèque en cap d’orquèstra: ensag de Sobeiràs sus ataca classica, Tyrone Pau va puntar entre los pals amb dos catalans sus l’esquina, un ten tu-ten ieu amb son alièr manda Guiraud a l’ensag, Canet al relèu de Sabri. A la pausa, Carcassona mena ja 22-6. Tre la represa, Robin arpateja e Tomàs Barrau punta un cinquen ensag pels audencs. Lo segond temps vendrà un camin de crotz (represa de la procession de la Sanch?) per la còla de Rosselhon, privada d’una palma monopolizada pels occitans. Barrau e Canet tornan marcar, Gressèque ensaca las transformacions amb la regularitat d’un metronòm (sièis sus sèt) e rajusta doas penalitats per faire bona mesura. Planchòt final: 44-6 al tèrme d’una partida ben capitada per un grop solidari que regalèt los sostens e tot lo public.
 
 
TO-CFL: Lo tombat fatal
 
Tota autra foguèt la segonda partida entre los campions actuals del Tolosa Olimpic e lo CFL, ont calguèt esperar las darrièras segondas per conéisser lo nom del segond finalista. Lo lesinhanés Quintillà marquèt lo primièr ensag, mas fa d’ans e d’ans que pòrta las colors tolzanas! Los Verd e Blanc prenián l’avantatge mercé a dos ensages signats Cooper (15a) e Tisseire (20a). Mas Tolosa passava davant en marcant dos ensages còp sus còp: un serpentejadís de Kheirallah (23a), puèi Boyer (25a). Kheirallah ajustava una penalitat (32a) a las transformacions e a la pausa los locals menavan 20-12. Dins lo segond temps, Lesinhan remontava son retard: penalitat de Cooper (55a), ensag de Michau (68a), mas i daissava son menaire de jòc Carrèra, nafrat. A la 77a minuta, Bozinac arrancava l’egalitat a 20-20 sus penalitat. Mas la darrièra cadena de tenguts menava lo dobertura Ford en posicion de tustar lo tombat qu’ensacava a doas segondas de la còrna: 21-20 pel TO. Regrèts per Lesinhan que torna mancar coma en 2013 dins las darrièras segondas la qualificacion. Los tolzans poiràn anar defendre lo bloquièr lo dissabte 9 de mai sus l’estadi de Colomièrs. La partida contra Carcassona s’anóncia bèla e indecisa.
 
 
Los Dracs borrolats e ganhaires
 
La vida dels Dracs es pas brica ongan un long riu quiet. La linha dels tres quarts a perdut Duport per la sason, Pomeroy èra indisponible e, dissbate de matin, Tonga anèt a l’espital amb una arcada subrecilhara conflada d’ont se tirèt... un tròç de dent. Oldfield demorava lo sol titular a son ala amb Cardace a son costat. L’autra ala èra compausada de Pala e de l’U19 Fouad Yaha. Davant, un Dragonet Springer èra cridat en renfòrç. Fàcia a Hull KR, Baitieri marcava lo primièr, mas la defensa catalana se mostrava ninòia e daissava Blair egalizar abans que Cokrayne balhèsse l’avantatge als angleses (26a). Mas Springer, just dintrat, estirava lo braç per puntar son primièr ensag en Superliga e Oldfield balhava l’avantatge als catalans en bonificant una combinason entre Bòsc e Whitehead. 16-12 pels Dracs a la pausa. A la represa, Pelissièr s’escapava al ras del tengut e marcava, Hull KR replicava, mas Ben Garcia e Eloi Whitehead metián los Dracs fòra portada dels angleses que clavavan la marca dins la darrièra minuta jos una pluèja que compliquèt la circulacion de la palma dins lo darrièr quart d’ora. Los catalans ganhan la partida: 32-24.
 
Los Tigres de Castleford, ont los Dracs anaràn jogar dimenge, an ganhat a Salford 22-20: aquò plaça los catalans en oitena posicion.
 
En cap de classament, es de notar la desfaita sus sa pelena del cap de fila Leeds, despassat pels Lops de Warrington: 29-10.
 
 
Un ensag extraterrèstre
 
En Austràlia, la jornada es marcada per l’ensag marcat pels Tigres: l’alièr Kevin Naiqama en extension remanda d’una passa òrba una palma qu’aviá passada la linha de balon mòrt, son arrièr recupèra e marca.
 
Los Broncos de Brisbane e los Dracs de St. George ocupan las doas primièras plaças del classament abans la tradicionala pausa internacionala amb lo rescontre Austràlia-Nòva Zelanda del 1r de mai a Brisbane (de seguir sus Be In Sport). Dissabte, dins l’estadi de la Còsta d’Aur, partida entre Papoasia e Fiji, qu’alinharàn l’èx-Drac Millard a la dobertura e l’èx-AEC Sadrau coma remplaçant.
 
 
Finala tarnesa en Elèit 2?
 
Aquesta fin de setmana, las doas mièjas finalas del campionat d’Elèit 2 se debanaràn a Sant Gaudenç: se poiràn seguir los rescontres Albi-Vilafranca de Roergue e L’Escura-Baó. Las doas esquipas de Tarn semblan las melhor armadas per disputar lo bloquièr d’aquel nivèl.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

MAtieu Castel Marselha
7.

E coma felen d'un ancian sòci de l'ASC (ai encara sa carta de sòci dau consèu d'amenistrança de 1946), siáu evidentament d'a fons per elei !

  • 1
  • 0
Alan Roch Carcassona XIII
6.

Istòrias, règlas.. son de trapar sul site de la Federacion : http://ffr13.fr (bon, es en farncés, avèm aps agut lo temsp de ba revirar en occitan) e tanben sus Wikipedia.

En lenga nòstra,se pòt legir :
- 13 coma rugbí (IEO-Descobèrtas, paregut en 2000)
- L a partida clandestina/Le match clandestin, roman de Frederic Vouland (IEO-Vendémias, 2013)
cada libre : 13 € (franc de pòrt pels legeires del Jornalet)
De comandar a IEO-aude BP 105 11022-caracssona Cedex

Podètz seguir la finala ASC-Tolosa sus França-3-Sud dissabte 9/05 (15h). Res vos empacha pas d ecopar los on e d'escotar nòstre comentari en occitan : www.lengadoc.eu

Cada setmana, BeInSport retrasmet partidas de la Super-league (coma totas las dels Dracs a Perpinya) e partidas del campionat australian

  • 1
  • 0
Pirolet
5.

#4 Efectivament es fòrça mai rapid. Balha un espectacle pro diferent.

  • 3
  • 0
Lílian Chovèl Charmont / Le Crest / Auvèrnha-bassa
4.

Marces Matieu par aquela precision. Qu'es verai qu'aquò-es un biau sport. N'i a soen d'articles dins Jornalet sobre aqueu biais de jogar le rubi e quò me baila l'enveja de gaitar de partidas. Sobretot qu'aquò me sombla mai rapid que le "quinze", non pas?

  • 3
  • 0
MAtieu Castel Marselha
3.

#2 La diférencia mai visibla es l'abséncia de mesclanha "organizada" dins lo 13. Fòrça bèl (e espectaclós) espòrt.

  • 4
  • 0

Escriu un comentari sus aqueste article