Aquesta dimenjada èra anonciada magica del costat de Newcastle, al nòrd d’Anglatèrra. Lo rendètz-vos tretzista foguèt un grand recampament festiu e esportiu.

Dissabte, Wigan se remetèt de sa desfaita a Perpinhan en batent lo cap de fila Leeds: 27-12. L’arrièr Bowen, transparent a Brutus, foguèt nomenat òme de la partida! Hull FC ganhèt lo dèrbi: 46-20 contra Hull KR e Widnes estofèt Salford: 38-16. Dimenge, los Tigres de Castleford chapèron Wakefield 56-16 e Saint Helens prenguèt lo pas sus Warrington 20-16. Los Dracs rescontravan los Gigants d’Huddersfield qu’amb de passes de sèt lègas menèron 16-0. Los catalans se reviscolèron, marquèron 4 ensages per Pelissier, Taia e dos còps per Carney. Dureau manquèt la darrièra transformacion puslèu aisida e sus la còrna, amb un ensag dins lo recantonet transformat los angleses tornèron a 22 pertot. Un punt de perdut pels catalans que demòran en setena posicion al classament.
 
Tre divendres, un viatge malaisit s’anóncia a Warrington e, probable, sens Todd Carney tocat en tota fin de partida als bicèps e, segur, sens lo jove pilar Springer partit a Castleford.
 
 
La primièra pels Maroons
 
Dimècres passat, 80 000 espectators se quichavan a l’ANZ Stadium de Sydney per seguir una partida sarrada entre los Blaus de la Nòva Galas del Sud e los “Maroons” de Queensland que venquèron de l’espessor d’un tombat de Cronk: 11-10 . Segonda partida de la tièra 2015 dels Estats d’origina: lo dimècres 17 de junh a Melbourne.
 
 
E tanben...
 
Dissabte, se debanava la finala del Campionat de França de XIII Cadieral a Salsas. Caors aviá ganhada totas las partidas de l’an, mas los novèls campions d’Euròpa locals, los Andidracs, fasián la diferéncia 68-26.
 
Aqueste dissabte 6 de junh, de vèspre, a l’Estadi Domèc de Carcassona, se debanaràn las finalas dels Trofèus e Campionats dels minims e cabdèths, mas sens esquipa locala a la granda decepcion dels organizaires de l’Ostal dels Joves de Carcassona aprèp la desfaita dels cabdèths en mièja finala a Perpinhan 18-16!
 
 
 
 
Alan Roch