Bandièra01 1180x150: Comuna de Tolosa

Actualitats

Rugbi XIII: tròp longas las dents dels Lops....

Loló Delon, un grand òme del XIII, ven de partir
Loló Delon, un grand òme del XIII, ven de partir
Aqueste divendres, los Dracs jogavan a Warrington. La Dimenajda Magica lor i a fait pèrdre Tònga per la sason e Todd Carney per doas bravas mesadas. Coma Tomàs Bòsc èra encara nafrat, Robin ocupèt lo pòst de mièg de dobertura, mas es pas Carney qual vòl. De mai, lo jòc al pè de Dureau foguèt catastrofic. Menats 12-6, los Dracs reprenguèron l’avantatge 18-12. Manquèron de tuar la partida dins una escapada d’Escarré que s’acabèt amb una passa mal assegurada, vertadièr simbòl del rescontre. Los Lops, jamai sadols, signèron tres ensages en seguida per daissar 26-18 los Dracs a lors problèmas, a l’oitena plaça e a la necessitat refortida de ganhar las doas partidas que venon a Brutus: contra Hull FC aqueste dissabte 13 (18h) e contra Wakefield dissabte 20.
 
Lo president Guasch es malcorat de l’anóncia del despart de Ben Garcia cò de las Pantèras de Penrith per la sason venenta e lo jove pilar Springer es mes a l’escart per aver ja signat a Castleford. Per contra, costat positiu, l’RFL ven d’oficializar la participacion dels joves U19 al campionat Academy l’an que ven.
 
 
En omenatge a Loló Delon
 
La setmana passada, los juniors de Marselha ganhèron lo campionat de Nacionala. Menats 19-6 pel Barcarés, signavan 22 punts en seguida per ganhar 28-19. En campionat femenin, Factura-Biganòs conservèt lo bloquièr en ganhant contra Tolosa.
 
Dissabte a Carcassona, se debanavan las finalas dels minims e cabdèths. En minims, lo trofèu revenguèt al CF Lesinhan (victòria contra Tonens 22-14) e lo campion a per nom Sant Martin de Crau amb l’ensag de la victòria marcat sus la darrièra accion (20-18, fàcia a Sant Estève). En cabdèths, lo trofèu partiguèt a Illa de Tet, mai fòrts que Marselha (30-24), e los campions son los Sang e Aur del XIII Catalan que tenguèron totjorn a distància l’Entenduda Avinhon-Barbentana (29-18).
 
L’ambient festiu, lo vam e l’engatjament dels jogaires e l’esperit ofensiu e esportiu representèron l’omenatge mai bèl de rendut a Loló Delon, desaparegut en debuta de setmana e que foguèt lo creator, puèi, d’ans e d’ans, lo responsable de l’MJC XIII, lo plantolièr de totes los talents tretzistas de Ciutat.
 
 
L’amassada generala
 
Aqueste dissabte 13, se tendrà l’amassada generala de la Federacion a Sant Estève que deuriá desvelar la formula del Campionat d’Elèit per la sason venenta, campionat que deuriá comptar amb la participacion d’Albi.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article