Bandièra01 1180x150: Comuna de Tolosa

Actualitats

Desaparegut lo president del grop privat chinés qu’a crompat l’aeropòrt de Tolosa

Demissionèt divendres passat, e mai se desapareguèt al mes de mai en rason d’una enquèsta per corrupcion

| Transports Urbains Français
Mike Poon, lo president director general de Symbiose, lo grop privat chinés que l’estat francés li vendèt en abril passat lo 29,9% de l’aeropòrt de Tolosa-Blanhac, demissionèt divendres passat e a desaparegut. Poon èra tanben president de China Aircraft Leasing Company (CALC), lo client mai important d’Airbus, qu’aviá fach 143 comandas. Tanben lo director financièr de CALC demossionèt. Las doas demissions tombèron d’un 20% lo cors de la borsa a Shanghai. Dijòus passat se suspendèt l’accion.
 
De fonts pròchas del dorsièr en China asseguran que Mike Poon desapareguèt lo 19 de mai passat en rason d’una enquèsta lançada per las autoritats chinesas per corrupcion entre CALC e China Southern Airlines, son principal client. Lo govèrn chinés a lançat d’operacions anticorrupcion dempuèi qualques meses. De son costat, la direccion de CALC assegura qu’a pas trobat cap d’irregularitat. Se passa que Mike Poon es dirèctamet accionari de CALC, al 33%, per mejan de sa societat Friedmann Pacific Asset Management.
 
Lo Collectiu Contra la Privatizacion de l’Aeropòrt de Tolosa-Blanhac a demandat al govèrn francés de “renonciar a la venda, sens esperar lo recors al Conselh d’Estat” que lo collectiu aviá depausat.
 
 
Una venda polemica
 
Per un arrèst del 15 d’abril passat, lo Ministèri francés de las Finanças e dels Comptes Publics faguèt oficiala la venda del 49,99 % de las parts del grop ATB (Aeropòrt Tolosa-Blanhac) a Symbiose. L’estat, que possedissiá lo 60% de las parts, ne sèrva pas que lo 10,01%. Lo crompaire, Symbiose, es un consòrci privat chinés compausat de doas societats: Shandong Hi-Speed Group e Friedmann Pacific Asset Management. Lo prètz se fixèt a 308 milions d’èuros, çò es la mitat del budget annual de la comuna de Tolosa.
 
Dins lo Jornal Oficial del 15 de març, ja s’èra aprovada aquesta venda dins un arrèst de Ségolène Royal, la ministra de l’ecologia e del desvolopament sostenable. Èra una posicion curiosa venent del ministèri supausat defendre l’environament quand se sap que lo consòrci chinés prevesiá un retorn sus investiment rapid en far créisser la frequentacion de l’aeropòrt per lo far passar de 7,5 milions de viatjaires en 2014 a 18 milions d’aquí a 30 ans. Tanben se prevei l’aumentacion dels còstes de las concessions aeroportuàrias e comercialas, que segurament se repercutaràn dins los prèses de las bilhetas.
 
Aquela decision de dilapidacion del patrimòni economic e logistic occitan, presa dins los burèus de París sens concertacion vertadièra, levèt l’oposicion d’EELV e mai se la resisténcia politica a aqueste diktat es estada fòrça timida.

Articles relacionats

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Pirolet
2.

Coma quita pas de dire o govèrn, e qualques aluserpits regionals: cal far d'afars amb los chineses.

  • 0
  • 0

Escriu un comentari sus aqueste article