Demòra una sola jornada de la primièra fasa de Superliga de jogar e lo nom dels uèit qualificats pel segond torn es quasiment conegut.
 
De fait, la bona novèla de la setmana pels Dracs foguèt la desfaita d’Hull KR dins lo dèrbi fàcia als vesins d’Hull FC: 12-22.
 
Per çò que, costat Castilhet, la setmana contunhèt de veire l’infirmariá catalana al complet: Todd Carney ensagèt plan de córrer un o dos còps, mas aquò durèt que qualques minutas. Doncas, per recebre los Gigants d’Huddersfield, lo jove Lucàs Albèrt èra confirmat a la dobertura (fàcia a la mandra vièlha de Danny Brough); a l’ala, Sigismeau jogava el tanben sa segonda partida dins la competicion.
 
E apuèi: los Dracs perdèron lo segonda linha Whitehead assucat tre la cinquena minuta, lo capitani Remi Casty se trapèt lèu amb l’arcada subrecilhara esclatada abans de se clacar dins lo segond temps...
 
A la pausa, davant 10 000 espectators, las doas formacions èran a egalitat: 6-6. A la represa, Morgan Escarré correguèt un quasi-cent mètres a faire pallir lo Jerèmias Vicaut per marcar entre los pals. Mas los Gigants egalizavan aprèp un ensag consecutiu a una passa enabans gròssa coma un ostal qu’una sola persona vegèt pas dins l’estadi: l’arbitre! Una decision que metèt dins una colèra negra coma un banyuls vièlh lo president Guasch! De palmas perdudas en gèstes d’indisciplina, una penalitat anglesa faguèt la diferéncia: 14-12. Lo còp de pè per l’egalitat de Dureau passèt just en defòra dels pals. Los catalans defendèron a plec de braces, mas aguèron pas las fòrças per trapar de solucions ofensivas e victoriosas.
 
Los vaquí doncas oitens al classament amb 2 punts d’avança sus Hull KR e una diferéncia de punts de... mai 1 mentre que los angleses son a mens 72
 
Caldriá vertadièrament un tèrratrem per qu’Hull KR ganhèsse divendres a St Helens e que los Dracs perdèsson a Leeds dimenge sus de marcas grandassas qu’empacharián la qualificacion catalana pel Super-8.
 
Per l’ora, lo grop pareis cansat, los avants en manca de percussion e lo rejoveniment, portaire d’avenir, permet pas un jòc assegurat. Bona volontat e solidaritat sufison pas en l’abséncia d’un menaire de jòc identificat e que tirariá lo grop. Bon, mas, per l’ora, se cal petaçar atal e s’acontentar d’una sason de transicion!
 
 
L’esquipa tecnica en plaça a Carcassona
 
Al pè de Ciutat, se se sap pas encara tot sul recrutament a l’AS Carcassona, se coneis ara l’estructuracion del grop tecnic: lo Joan-Francés Albèrt (entraïnaire de l’esquipa de França juniors e director de la Calandreta de Ciutat) aurà una plaça de director esportiu, lo Patric Alberòla serà lo segond d’Alèx Couttet per entraïnar l’esquipa primièra.
 
L’AG de l’FC Lesinhan a oficializada l’arribada de tres carcassoneses: Anderson, Barrau e Roanet. Aquò promet pels dèrbis de la sason novèla!
 
 
 
 
Alan Roch