Bandièra01 1180x150: Comuna de Tolosa

Actualitats

Rugbi XIII: los Dracs en Super 8

Solatjament del costat de Perpinhan: los Dracs son en Super 8, mas dins quinas condicions?

Desfaita catalana, mas qualificacion, jos la pluèja anglesa (sit Dracs)
Desfaita catalana, mas qualificacion, jos la pluèja anglesa (sit Dracs) | Dragons Catalans
La victòria de Saint Helens 52-12 sus Hull KR, dijòus en serada, qualificava matematicament los Dracs per la segonda fasa dita Super 8 de la competicion.
 
Mas: lo capitani Casty a acabada la sason e n’a per uèit meses per tornar trapar lo terren entre operacion (ligaments del genolh) e reeducacion; lo president Guasch a pres una emenda de 1400 èuros per aver dit çò que pensava dels arbitres del rescontre contra los Gigants; Loís Anderson poguèt pas téner sa plaça en segonda linha aprèp l’entraïnament del dimenge de matin... Lo retorn de Todd Carney (enfin) a la dobertura capitariá a inversar lo cors de las causas cò dels caps de fila, los Rinocèros de Leeds? Una partida jogada jos una plojassa estivenca e anglesa e los entraïnaments de la setmana amb palmas chunchadas dins d’aiga sabonada empachèron pas los catalans d’èsser malaisits palma en man. A la mièja ora, aprèp d’ensages, de Gigòt e Escarré menèron 10-6, mas dins las cinc darrièras minutas del primièr temps coma tròp sovent se faguèron doblar per dos ensages assassins: 16-10 per Leeds. Dins lo segond temps, los Rinocèros profeitèron de contras e de l’indisciplina catalana per ganhar 36-22.
 
Los Dracs son qualificats en oitena posicion amb 20 punts per 9 victòrias, doas egalitats e 12 desfaitas . Dins lo Super 8, los punts son gardats e cal acabar dins los 4 primièrs per se qualificar. E se mal anar quèrre lo trio de cap —Leeds (33 punts ), St Helens (32 punts) o Wigan (31 punts)— e caldriá una tièra de victòrias e de concorses de circonstància per agantar la quatrena plaça a la perseguida d’Hull FC (22 punts), Warrington (24 punts) e, mai que mai, Castleford (26 punts) o Huddersfield (28 punts).
 
D’aitan mai que los Dracs auràn tres recepcions a Brutus (Leeds, St Helens, Castleford) per quatre desplaçaments (Wigan, Huddersfield, Warrington e Hull).
 
Lo calendièr del Super 8 serà conegut aqueste dimècres 29 de julh de matin.
 
Pel Middle Eight que qualificarà quatre formacions per la Superliga 2016, Widnes, Hull KR, Salford e Wakefield tornaràn trapar Bradford e tres autras formacions istoricas: Leigh, Halifax e Sheffield. Aprèp las 7 partidas, los 3 primièrs en Superliga e barratge entre lo quatren e lo cinquen.
 
 
Plaça a la Cup
 
Aquesta dimenjada serà consagrada a las mièjas finalas de la Cup. Qualques partidas que se poiràn seguir sus Be In Sport: Leeds-St Helens se jòga a Warrington aqueste divendres 31 de julh (9 oras de la nuèit, ora occitana) e Warrington rescontra Hull KR aqueste dissabte 1r d’agost  a doas oras manca un quart del vèspre (ora occitana) sus la pelena de Leeds.
 
 
Carcassona en crisi
 
Nos cal tornar sus la situacion fosca de l’AE Carcassona XIII ont diluns passat lo burèu mes en plaça en junh demissionava pretextant de la situacion financièra del club e d’una campanha de destabilizacion. L’ancian president Joan Guilhèm anima un directòri de 7 personas per destricar la situacion financièra e assegurar un recrutament que permeta a l’AE Carcassona XIII de téner sa plaça istorica dins lo campionat d’Elèit 1; lo genre de fulheton que l’òm se’n passariá plan!
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris

Alan Roch Carcassona
2.

Lo calendièr dels Dracs pel Super-Uèit :
http://www.catalansdragons.com/articles-9/109-3425-le-calendrier-du-super-8-devoile/

  • 0
  • 0

Escriu un comentari sus aqueste article