Mentre que Leeds, St Helens e Wigan an mai que probable los dos pès en mièjas finalas de Superliga, demòra de conéisser lo quatren qualificat: Castleford o Huddersfield.
 
 
A l’imatge de la sason
 
Bon, avètz comprés: aquò significa que los Dracs daissèron passar la possibilitat eventuala de dintrar dins lo cairat final amb una novèla desfaita a Huddersfield aqueste divendres de ser. Todd Carney poguèt pas res cambiar malgrat una passa decisiva que permetèt a Tonga de dobrir la marca e un ensag tròp tardièr. Los Dracs faguèron jòc egal amb lors adversaris, mas Tonga reposicionat a l’ala, balhèt doas palmas d’ensag als Gigants: una (aquò ven costumièr) just abans la pausa: 16-6 pels angleses. Los Gigants daissèron venir dins lo segond temps: doas penalitats e un ensag a dètz minutas del tèrme per ganhar 24-12 (resumit de la partida).
 
Dijòus, Castleford se placèt dins la corsa a la qualificacion mercé a un tombat de Finn dins la darrièra minuta: 17-16 contra Warrington. Divendres, Leeds batèt Wigan 25-18 http://www.superleague.co.uk/report/11943 e Hull FC qu’anèt ganhar a St Helens 32-22 amb tres ensages marcats per l’alièr Curtis Naughton: aquò remanda los Dracs en darrièra posicion.
 
Dissabte, los Dracs recebràn Castleford per una partida malaisida: los catalans an res mai (o caldriá una cordelada de miracles) d’esperar del Superuèit levat de mostrar sas qualitats fàcia a aqueles Tigres qu’ensajan d’arrapar la qualificacion. Al programa d’aquesta tresena jornada de las pelhòfas: St Helens-Huddersfield dijòus e doas partidas divendres: Warrington-Wigan e Hull FC contra Leeds.
 
 
Que faire de Sam Burgess?
 
Una question que se pausan los responsables del XV d’Anglatèrra es: de que faire de Sam Burgess? Dempuèi son passatge a XV, se sap pas en club (Bath) se fan jogar lo pilar tretzista tresena linha d’ala o al centre. L’autre ser, joguèt al centre de la còla de la Ròsa contra França. L’Équipe s’estonèt que joguèsse pas coma una borrona, mas que saupèsse traucar e sustot placar-cartonar-caramelizar! Bon, prenguèt tanben un jaune; de véser se serà retengut per la competicion mondiala...
 
Per contra, nos es plan malaisit e fòra idèa d’imaginar un pilar quinzista venir tres quarts a tretze!
 
 
NRL: Los Cavals Fòls sols primièrs
 
En NRL australiana, los Cavals Fòls de Brisbane baton 32-6 los Dracs de Sant Jòrdi e prenon dos punts d’avança suls Vaquièrs batuts 31-18 pels Lapinons e que se fan ragantar e despassar pels Pols de Sydney. Justament, en cap d’aficha de la vint e quatrena jornada, i a lo desplaçament dels caps de fila aqueste dissabte 22 a Sydney cò dels Pols.
 
 
Los plasers del XIII al femenin
 
La Federacion lança una operacion de desvolopament de la practica feminina del XIII per passar de 700 a 1000 jogairas per la sason novèla amb tres objectius principals: tres nivèls de competicion en juniors-seniors; la mesa en plaça d’un campionat minimas e cabdèthas; la preparacion de l’esquipa de França per la Copa del Mond de 2017. Per ne saber mai, vos podètz raprochar dels clubs tretzistas o contactar la Federacion a a.janzac@...
 
 
 
 
Alan Roch