Bandièra01 1180x150: Comuna de Tolosa

Actualitats

Rugbi XIII: los Dracs amb un còr atal

Un ensag marcat per Todd Carney, lo rei de Brutus
Un ensag marcat per Todd Carney, lo rei de Brutus | Dragons Catalans

En aquesta fin d’agost, las causas s’esclarzisson dins los campionats de Superliga e d’NRL; una brava finala de Cup se jogarà aqueste dissabte. En Occitània e Catalonha, lo temps es a las partidas amicalas abans la represa dels campionats a la mitat de setembre.


Dracs de fuòc e Tigres de papièr
 
Los Dracs, fòrabandits de la corsa a las mièjas finalas, recebián aqueste dissabte una esquipa encara en corsa per aquesta qualificacion: los Tigres de Castleford. Jogant sus un ritme alèrta, los catalans marcavan lèu-lèu quatre ensages per menar 20-0. Mas, a la 28a, Ben Pomeroy que repreniá aprèp una partida de suspension, èra l’autor d’un placatge dangierós que l’arbitre transformava logicament en un novèl carton roge! Los catalans se trapavan amb mai de cinquanta minutas de jogar en inferioritat numerica. Castleford marcava, mas dins las darrièras trenta segondas, Morgan Escarré i anava de sa corsa costumièra a l’Usain Bolt (mas amb la palma jol braç): 26-6 pels catalans al retorn als vestiaris. A la represa, Castleford marcava d’entrada, mas Todd Carney armava una passa sautada de mai de vint mètres per Tòni Gigòt reposicionat a l’ala. Los angleses puntavan un novèl ensag a l’ora de jòc, mas lo Gigòt marcava pel tresen còp de la serada, aqueste còp sus intercepcion. Novèl ensag anglés e replica de Morgan Escarré al ras de sos pilars. E se los Tigres clavavan la marca, lo planchòt marcava 44-26 pels Dracs. Lo dobertura Todd Carney foguèt sobeiran a la manòbra e los Dracs mostrèron soliditat, solidaritat, esperit d’iniciativa: de qué emplenar l’armari dels regrèts sus una sason mancada.
 
Leeds, venceire sus la pelena d’Hull FC 36-22, demòra cap de fila davant Wigan que ganha a Warrington 28-0 mentre que St Helens marca lo pas e se fa batre a l’ostal 28-22 pels Gigants d’Huddersfield.
 
La partida venenta dels Dracs se jogarà lo dissabte 5 de setembre del costat de Londres per un rescontre deslocalizat de Wigan.
 
 
Per qual la Cup?
 
Londres serà tanben la capitala tretzista aqueste dissabte 29 d’agost amb la finala de la Cup, a Wembley (4 oras del vèspre, ora occitana; difusion sus Be In Sport). Los Rinocèros de Leeds seràn los favorits logics d’aquela confrontacion amb Hull KR http://www.hullkr.co.uk ont John Boudebza e Kevin Larroyer portaràn lo malhòt roge.
 
 
Salford se met dins lo roge
 
Es de notar una brava suspresa dins la competicion del Uèit del Mitan: se Wakefield se’n tira just cò dels Centurions de Leigh 17-16, vaquí la primièra victòria d’una formacion del Championship sus un pensionari del primièr nivèl: Bradfordbat largament Salford 41-10; las plaças per la Superliga 2016 seràn caras!
 
 
Represas amicalas
 
Al país, la represa del campionat d’Elèit se farà la dimenjada dels 12 e 13 de setembre. Limós anóncia la signatura de 2 joves papós. L’AE Carcassona vei tornar amb plaser son jove segonda linha neozelandés Kouma Samson. Aquesta dimenjada, veirà las primièras partidas amicalas: dissabte, Carcassona va jogar contra Avinhon; Tolosa rescontrarà Albi. Vilanuèva d’Òlt se prepara a festejar sos 80 ans lo dissabte 12 de setembre amb la recepcion de l’esquipa nacionala de Belgica.
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article