Bandièra01 1180x150: Comuna de Tolosa

Actualitats

Rugbi XIII: Leeds se garda la Cup

Monument a la glòria dels grands jogaires angleses de Rugby League a las pòrtas de l’estadi de Wembley.
Monument a la glòria dels grands jogaires angleses de Rugby League a las pòrtas de l’estadi de Wembley.

Davant mai d’80 000 espectators, se jogava aqueste dissabte la finala de la Cup a Wembley. A l’entrada de l’estadi, s’inaugurèt una estatua dedicada al rugbi de XIII.
 
Leeds defendiá son trofèu fàcia als jogaires d’Hull KR. Quand un rinocèros jòga amb un barbarós, que volètz que se passe? Sèm pas dins una faula o un conte ont lo pichon rusat finís que ganha.
 
Los Rinocèros senhoregèron sus la pelena e profeitèron de las aproximacions dels Roges amb lor arrièr Dixon dins lo ròtle de Supermalaisit. John Bodebza e Kevin Larroyer poguèron res contra las èrsas blavas e jaunas.
 
Tres ensages dins lo primièr temps: 16-0 e la punicion contunhèt e s’amplifiquèt: sièis ensages de mai dins lo segond temps. Una marca finala istorica de 50-0. Una primièra, per un jogaire dins una finala de la Cup: cinc ensages per l’alièr Tom Briscoe. Lo capitani Kevin Sinfield podiá brandir un còp de mai la Copa.
 
Demòra una mission per l’esquipa de Leeds: faire lo doblat, çò qu’a jamai capitat de faire.
 
E divendres, Leeds recep lo campion 2014: St Helens. Tre dijòus, Huddersfield recep Castleford: las plaças per las mièjas finalas son en jòc per las doas formacions. Dissabte, los Dracs seràn a Londres ont Wigan a deslocalizat lo rescontre. La partida de bas de tablèu Warrington-Hull FC completa lo programa.
 
 
Austràlia: en rota per las pelhòfas
 
Demòra una jornada de la primièra fasa de jogar en campionat NRL mas los qualificats per las pelhòfas son coneguts.
 
En cap de classament, trapam los Polets-Roosters qu’an levat las darrièras illusions de qualificacion a Manly, 46-10, e los Brisbane Broncos que son anats passar 47-12 als campions Lapinons. Seràn acompanhats dins lo grop del naut pels Vaquièrs e siá per las Làmias siá per Melbourne.
 
Los qualificats, entre la 5a e l’8a plaça pels barratges, seràn doncas siá Melbourne, siá las Làmias, acompanhats pels Bulldogs, los Lapinons, e los Dracs de Sant Jòrdi. Al programa de la darrièra jornada, los prometeires Broncos-Tempèsta de Melbourne, dijòus e lo dèrbi Polets-Lapinons, divendres.
 
 
En plaça per la represa
 
Lo campionat d’Elèit va tornar prene e las esquipas se meton en plaça. Dins los rescontres amicals, se nòta tres victòrias audencas: Limós contra los Dragonets 32-30, Carcassona contra Avinhon 32-18 e Lesinhan fàcia a Baó: 30-24. Albi a batut Tolosa-Broncos 28-24 mentre que los jogaires de Palau montavan al cim del Canigó.
 
Originalitat de la dimenjada: en partida amicala, Palau recebrà Carcassona mentre que las doas formacions se traparàn a Domèc lo dimenge 13 de setembre per la primièra jornada del campionat.
 
Mai original encara: lo talonaire dels campions de França, lo Tolosa Olimpic, Kane Bentley, a marcat tres ensages e permés la victòria de Boston sus Atlanta: 44-12 en finala del campionat dels Estats Units. L’entraïnaire de Boston es Dustin Cooper que joguèt a Pià e a Lesinhan. Coma qué, la planeta es un grand vilatge oval!
 
 
 
 
Alan Roch

Jornalet es possible gràcias al sosten economic e jornalistic dels legeires e benevòls. Se lo podètz sosténer en venent sòci dels Amics del Jornalet o de l'Associacion ADÒC, o tot simplament en fasent un don, atal contribuiretz a far un mèdia mai independent e de melhora qualitat.

Comentaris


I a pas cap de comentari

Escriu un comentari sus aqueste article